Ubuyapani bwamaganye Ubushinwa nyuma yuko indege z'intambara zabwo zitunze radari ku ndege z'Ubuyapani

Ubuyapani bwamaganye Ubushinwa nyuma yuko indege z'intambara z'Ubushinwa zitunze radari ku ndege z'Ubuyapani, mu gihe umwuka mubi hagati y'ibihugu byombi urimo kwiyongera.

Gutunga radari ku ndege bifatwa nko kwanduranya kuko bishobora kuba ikimenyetso cy'igitero kigiye kuyigabwaho. Ubuyapani bwavuze ko habaye ibikorwa bibiri nk'ibyo ku wa gatandatu hafi y'ibirwa bya Okinawa biri mu majyepfo y'igihugu.

Ubuyapani bwavuze ko bwihutiye kuhageza indege zabwo z'intambara mu gusubiza ku ndege z'intambara z'Ubushinwa zo mu bwoko bwa J-15, mu gihe Ubushinwa bwashinje Ubupayani "gutoteza" ingabo zabwo mu myitozo ya gisirikare. Nta wakomeretse cyangwa ibyangiritse byatangajwe.

Umubano wa dipolomasi hagati y'Ubuyapani n'Ubushinwa waragabanutse kuva mu kwezi gushize, nyuma yuko Minisitiri w'intebe w'Ubuyapani, Sanae Takaichi, yumvikanishije ko Tokyo ishobora gufata icyemezo cya gisirikare niba Beijing igabye igitero kuri Taiwan.

Beijing ibona Taiwan, yiyobora ubwayo, nk'igice cy'ubutaka bwayo kandi ivuga ko ishobora gukoresha ingufu kugira ngo yongere gusubirana na yo.

Impande zombi zakomeje gukoresha amagambo akakaye zirushaho guhangana, kandi uku gukurura umwuka mubi gukomeje kugira ingaruka ku buzima bwa buri munsi bw'abaturage bo mu bihugu byombi.

Mu cyumweru gishize, abarinzi b'inkengero z'inyanja b'Ubushinwa n'ab'Ubuyapani batangaje ibisobanuro bitandukanye ku bushyamirane bwabaye hafi y'ibirwa buri ruhande rwita ibyarwo byo mu nyanja y'uburasirazuba bw'Ubushinwa.

Umutegetsi wo muri minisiteri y'ingabo y'Ubuyapani yavuze ko icyo indege z'intambara za J-15 z'Ubushinwa zigambiriye kidasobanutse, ariko yongeraho ko bitari bicyenewe gutunga radari ku ndege z'Ubuyapani niba icyari kigambiriwe cyari ukumenya aho izindi ndege ziri.

Indege za J-15, zaturutse ku bwato bwa gisirikare butwara indege bwa Liaoning bw'Ubushinwa, zatangiye gutumbereza radari ku ndege z'Ubuyapani saa kumi n'iminota 32 z'umugoroba ku isaha yaho ku wa gatandatu, zongera kubikora ahagana saa kumi n'ebyiri n'iminota 37 z'umugoroba.

Uwo mutegetsi yongeyeho ko indege z'Ubuyapani "nta kintu na kimwe zakoze cyafatwa nk'ubushotoranyi".

Minisitiri w'intebe Takaichi yabwiye abanyamakuru ku cyumweru i Wajima, mu ntara ya Ishikawa, ati: "Birababaje cyane. Ubuyapani bwamaganye bikomeye uruhande rw'Ubushinwa, kandi twasabye ko hafatwa ingamba zikomeye zo kurinda ko byasubira mu gihe kiri imbere."

Akomeza avuga ati: "Tuzasubiza twitonze kandi mu buryo buhamye."

Ingabo z'Ubushinwa zirwanira mu mazi zo zavuze ko ibyo Ubuyapani buvuga "bidahuye na gato n'ukuri" kandi zisaba Tokyo "guhita ihagarika kubasebya". Zongeyeho ko imyitozo yari iri kuba muri ako gace yari yaramenyeshejwe mbere.

Ibi bibaye nyuma y'ibyumweru bibiri Ubuyapani bwohereje indege zabwo mu kirere nyuma yo gutahura indege y'intambara itajyamo umupilote (drone) bicyekwa ko ari iy'Ubushinwa hafi y'ikirwa cya Yonaguni, kiri hafi ya Taiwan. Tokyo yavuze ko iteganya kohereza misile zivuye kuri Yonaguni, icyemezo cyarakaje Beijing.

Ukwezi kw'umwuka mubi kwatumye Ubushinwa busaba abaturage babwo kwirinda kujya mu Buyapani.

Ubushinwa bwanahagaritse gutumiza amafi n'ibindi biribwa byo mu nyanja biva mu Buyapani ndetse bunahagarika kwerekana filime zikunzwe zo mu Buyapani.