Uwemeye ko yishe Shinzo Abe wahoze ari Minisitiri w'intebe w'Ubuyapani yasabye imbabazi

Umugabo wiyemereye icyaha cyo kwica Shinzo Abe wahoze ari Minisitiri w'intebe w'Ubuyapani, bwa mbere yasabye imbabazi umuryango w'uwo yishe.

Tetsuya Yamagami, wari wemeye icyaha cyo kwica uwahoze ari Minisitiri w'intebe, yabwiye urukiko ku wa kane ko yumva yicuza cyane ku mupfakazi wa Abe, Akie.

Yamagami yakoresheje imbunda yakorewe mu rugo arasa Abe mu gihe yari mu gikorwa cyo kwiyamamaza mu mujyi wa Nara, mu burengerazuba bw'Ubuyapani, ku itariki ya 8 Nyakanga (7) mu 2022. Icyo gihe yahise apfira mu bitaro uwo munsi.

Urupfu rwa Abe rwateye kumirwa ku isi. Azwi cyane ku ngamba ze zikomeye mu by'ububanyi n'amahanga no ku bukungu bwe bwiswe "Abenomics" (Ijambo rikomoka ku mazina "Abe" na "economics".

Nk'uko byatangajwe n'itangazamakuru ryo mu Buyapani, Yamagami yabwiye urukiko ati: "Nateje [umuryango] imyaka itatu n'igice y'agahinda... nta rwitwazo mfite."

Bivugwa ko Yamagami yabwiye abashinzwe iperereza ko yarashe Abe kubera ko yamushinjaga kwamamaza Itorero ry'Ubumwe (Unification Church), ryavugwagaho gusenya umutungo wa nyina n'uw'umuryango mugari.

Ibyo Yamagami yavuze byatumye hatangira iperereza ku Itorero ry'Ubumwe, ryatangiriye muri Koreya y'Epfo kandi rizwiho gukora ubukwe bwa rusange (bwo mu kivunge).

Mu kwezi kwa Werurwe (3) uyu mwaka, urukiko rw'i Tokyo rwategetse ko iryo torero rihagarikwa burundu. Iryo torero rikaba ryaravuze ko rizarwanya icyo cyemezo kugeza ku iherezo.

Itorero ry'Ubumwe ryakunze guteza impaka mbere y'uko Abe yicwa, kubera inyigisho zaryo zivuga ko gushaka ari ingenzi ku gakiza k'umwuka.

Sekuru wa Abe, Nobusuke Kishi, na we wahoze ari Minisitiri w'intebe w'Ubuyapani, azwiho ko yari hafi y'iri torero kubera ko rirwanya abakomunisti. Abe na we akaba yarigeze kuvugira ijambo mu bikorwa byateguwe n'iryo torero.

Mu rubanza ruheruka, abashinjacyaha basomye inyandiko y'umugore wa Abe, aho yanditse ati: "Agahinda ko kubura umugabo wanjye, ntikazashira."