Corina Machado yavuze ko Trump akwiye igihembo cy'amahoro cya Nobel ku byo yakoze muri Venezuela

Umwe mu bakomeye batavuga rumwe n'ubutegetsi bwa Venezuela akaba unaherutse guhabwa igihembo cy'amahoro cyitiriwe Nobel yatangaje ko ifatwa rya Perezida Nicolás Maduro ari "intambwe nini cyane ku bwisanzure".

María Corina Machado kugeza ubu umaze amezi menshi aba mu bwihisho yahaye ikiganiro Fox News yo muri Amerika avuga ko ashimira igikorwa cya Trump muri Venezuela.

Ibihugu byinshi n'abategetsi bamaganye iki gikorwa cya Amerika, bamwe bacyise "gushimuta" perezida w'igihugu cyigenga no kuvogera ubusugire bwa Venezuela.

Corina Machado yavuze ko Delcy Rodríguez warahiriye gutegeka iki gihugu nka perezida w'inzibacyuho "adashobora kwizerwa".

Rodríguez yari amaze imyaka irindwi ari Visi perezida wa Venezuela kandi yamaganye igitero cya Amerika ku gihugu cye, anasaba Washington kurekura Perezida Maduro.

Corina Machado yavuze nyuma y'uko Maduro agejejwe imbere y'ubucamanza bwa Amerika mu rukiko rwo mu mujyi wa New York, aho yavuze ko ari "perezida washimuswe", ko ari "imfungwa y'intambara" ndetse yongeraho ko "akiri perezida" wa Venezuela.

Machado wamaze imyaka akora ubukangurambaga bwo kurwanya ubutegetsi bw'ishyaka PSUV rya Maduro kuva ryatsinda amatora bwa mbere mu 1998 hamwe n'uwarishinze Hugo Chávez.

Iyi mpirimbanyi y'uburenganzira na politike yahawe igihembo cya Nobel nyuma y'amezi ari mu bwihisho yarahunze ubutegetsi bwa Maduro avuga ko bwifuzaga kumugirira nabi.

Machado – utavuze aho aherereye - yatangaje ko ubu "ari gutegura gusubira" muri Venezuela "vuba bishoboka" kuko ngo mbere yumvaga nta mutekano ahafite.

Machado yakomeje kunenga ubutegetsi bwa Maduro avuga ko bwatsikamiye abatuvuga rumwe na bwo kandi bwafunze ubwisanzure bwo kuvuga n'ubwisanzure bw'itangazamakuru, ko "abanyamakuru 14" bafunze muri iki gihugu.

Mu kiganiro Machado yahaye Fox News yashimiye Trump kuri ibi yakoze muri Venezuela, yongeraho ko abona Trump akwiye igihembo cy'amahoro cyitiriwe Nobel.

Machado 'nta cyubahiro afite cyo kuba umuyobozi' - Trump

Ku wa gatandatu ubwo Maduro yari amaze gufatwa na Amerika no kuvanwa mu gihugu cye, Machado yashimagije icyo gikorwa, yongera kuvuga ko uruhande rwe ari rwo rwatsinze amatora yabaye mu mwaka ushize muri Venezuela.

Icyo gihe Machado yasabye abaturage ba Venezuela kujya inyuma ya Edmundo González bakamwemeza nka perezida wa Venezuela, González aheruka gutsindwa na Maduro mu matora.

Muri ayo matora yo mu mpeshyi ishize Corina Machado yangiwe kwiyamamaza, maze asaba abamushyigikiye kujya inyuma ya Edmundo González wari umukandida utavuga rumwe n'ubutegetsi.

Nicolàs Maduro yatsinze n'amajwi 51% maze atangira gutegeka kuri manda ya gatatu, naho Machado na González – wagize 43%, bakomeje kuvuga ko bibwe amajwi, ko ari González watsinze.

Bamwe ubu babona Machado nk'umuntu ushaka kujya guhatanira ubutegetsi muri Venezuela.

Mu kiganiro n'abanyamakuru ku wa gatandatu nyuma y'ifatwa rya Maduro, Donald Trump yavuze kuri Machado kuko bamwe bavugaga ko ashobora guhabwa ubutegetsi na Amerika.

Trump yarasubije ati: "Ntekereza ko byamukomerera cyane kuba umuyobozi. Ntabwo ashyigikiwe cyangwa ngo yubahwe mu gihugu…Ni umugore mwiza, ariko nta cyubahiro afite cyo ykuba umuyobozi."