Venezuela yafunze ambasade yayo muri Norvège kuko umukuru w'abatavuga rumwe n'ubutegetsi yahawe igihembo cy'amahoro cya Nobel

Leta ya Venezuela ku wa mbere yatangaje ko izafunga ambasade yayo i Oslo mu murwa mukuru wa Norvège, nyuma y'iminsi umukuru w'abatavuga rumwe n'ubutegetsi muri Venezuela María Corina Machado ahawe igihembo cy'amahoro cyitiriwe Nobel.

Mu itangazo yasohoye, leta ya Venezuela nta cyo yavuze kuri icyo gihembo cya Machado, ivuga ko gufunga iyo ambasade biri muri gahunda yo kuvugurura ambasade zayo.

Minisiteri y'ububanyi n'amahanga ya Norvège (Norway) yemeje ko Venezuela yafunze ambasade yayo i Oslo, ariko iyo minisiteri ntiyavuze impamvu.

Akanama ka Nobel i Oslo ku wa gatanu kahaye icyo gihembo María Corina Machado mu kumushimira kubera "umurimo we udacogora mu guharanira uburenganzira bwa demokarasi ku baturage ba Venezuela".

Perezida wa Venezuela Nicolás Maduro yavuze ko Machado, w'imyaka 58, ari "umupfumu w'umudayimoni".

Minisiteri y'ububanyi n'amahanga ya Norvège yavuze ko icyo cyemezo kibabaje.

Umugore uvugira iyo minisiteri yagize ati: "Nubwo hari ibibazo byinshi tutavugaho rumwe, Norvège irifuza gukomeza gufungura ikiganiro na Venezuela ndetse izakomeza gukora iganisha muri iki cyerekezo."

Yongeyeho ko igihembo cyitiriwe Nobel "kirigenga kuri leta ya Norvège".

Machado amaze imyaka akora ubukangurambaga bwo kurwanya Maduro. Ibihugu byinshi bibona ubutegetsi bwa Maduro, amazeho imyaka 12, nk'ubutemewe n'amategeko.

Muri uyu mwaka ushize, igihe kinini Machado akimaze aba mu bwihisho.

Mu guha icyubahiro icyo gikorwa gikomeye yagezeho, umukuru w'akanama ka Nobel, Jørgen Watne Frydnes, yavuze ko Machado ari "umuntu w'ingenzi, utuma abatavuga rumwe n'ubutegetsi muri politike bahoze bacitsemo ibice cyane bunga ubumwe... ku butegetsi bw'igitugu cy'ubugome ubu bwugarijwe n'amakuba y'imibereho n'ayo mu bukungu".

Machado yabwiye BBC Mundo, ishami rya BBC ritangaza amakuru mu rurimi rw'Iki-Espanyole, ko icyo gihembo yahawe ari "nk'urushinge" rutewe mu bikorwa bye bya politike.

Yagize ati: "Gishyira imbaraga, icyizere ku baturage ba Venezuela kuko dusanga [tubona] ko tutari twenyine."

Venezuela yanafunze ambasade yayo muri Australia, mu gihe yafunguye ambasade nshya muri Zimbabwe no muri Burkina Faso, ibihugu yise "abafatanyabikorwa b'igihe kirekire mu rugamba" rwo kurwanya "igitutu cya ba gashakabuhake".

Uko gufunga ambasade kwa Venezuela mu bihugu bibiri by'inshuti za hafi z'Amerika kubaye nyuma y'ibyumweru hari ubushyamirane bwinshi hagati ya Venezuela na Leta Zunze Ubumwe z'Amerika.

Igisirikare cy'Amerika cyashenye amato nibura ane cyavuze ko yari atwaye ibiyobyabwenge abikuye muri Venezuela abijyanye muri Amerika, cyica abantu nibura 21 bari bari muri ayo mato, mu gikorwa ubutegetsi bwa Perezida w'Amerika Donald Trump bwita intambara yo kurwanya ibiyobyabwenge.

Ibyo bitero byamaganwe n'ibihugu byinshi, birimo na Venezuela na Colombia. Bamwe mu banyamategeko bo mu mahanga bavuze ko ibyo bitero ari ihonyorwa ry'amategeko mpuzamahanga.

Mu mwaka wa 2010 ni bwo Norvège yaherukaga guhura n'ikibazo cya dipolomasi kubera igihembo cy'amahoro cyitiriwe Nobel.

Icyo gihe, Norvège yagiranye ikibazo n'Ubushinwa nyuma yuko Liu Xiaobo, utaravugaga rumwe n'ubutegetsi bw'Ubushinwa, wapfuye mu mwaka wa 2017, ahawe igihembo cy'amahoro cyitiriwe Nobel.

Byatumye Ubushinwa buhagarika ubuhahirane mu bucuruzi hamwe n'undi mubano bwari bufitanye na Norvège, bwongera gusubizaho uwo mubano hashize imyaka itandatu, mu mwaka wa 2016.