Igisirikare cya Sudani kivuga ko cyirukanye burundu inyeshyamba muri Khartoum

Igisirikare cya Sudani kivuga ko cyirukanye burundu umutwe witwara gisirikare wa 'Rapid Support Forces' (RSF) muri leta ya Khartoum ari na yo irimo umurwa mukuru wa Sudani.

Itangazo ry'igisirikare cya Sudani ryasohowe n'ibiro ntaramakuru SUNA (mu mpine y'Icyongereza) by'icyo gihugu rigira riti: "Leta ya Khartoum ntirangwamo inyeshyamba na busa."

Iryo tangazo risohowe nyuma y'amezi hafi abiri igisirikare cyisubije umujyi wa Khartoum – harimo n'ingoro ya perezida – kiwambuye umutwe wa RSF, mu ntsinzi ikomeye cyari kigezeho.

Mbere yaho ku wa kabiri, imirwano yari yadutse hagati y'izo mpande zombi ziri mu ntambara mu mujyi wa Omdurman – na wo uri muri leta ya Khartoum ndetse uri mu karere k'umurwa mukuru wa Khartoum.

Impande zombi zimaze imyaka ibiri mu ntambara.

Ibiro ntaramakuru AFP byatangaje ko ku wa mbere igisirikare cya Sudani cyavuze ko cyatangiye "igitero kinini" mu mujyi wa Omdurman.

Umutwe wa RSF nta cyo wari watangaza kuri ibi bivugwa n'igisirikare.

Khartoum yigeze kuba ari icyicaro cya leta ya Sudani ariko byabaye ngombwa ko abategetsi ba gisirikare b'iki gihugu bimukira mu burasirazuba mu mujyi wa Port Sudan uri ku cyambu (ikivuko mu Kirundi), nyuma yuko umutwe wa RSF wari wafashe ako karere karimo n'umurwa mukuru.

Kugeza mu gihe cya vuba aha gishize, umujyi wa Port Sudan wafatwaga nk'utekanye muri rusange ariko wabaye izingiro ry'imirwano irimo kwiyongera ubwo muri uku kwezi wagabwagaho ibitero by'indege nto z'intambara zitajyamo umupilote (zizwi nka 'drone'), igisirikare cyegetse ku mutwe wa RSF.

Ibyo bitero byibasiye ibikorwa-remezo by'ingenzi ndetse bituma amazi aba macye n'ikibazo cy'ibura ry'umuriro w'amashanyarazi kirahuhuka.

Iyi ntambara yanagize ingaruka zo mu rwego rwa dipolomasi, umubano hagati ya Sudani na Emira Zunze Ubumwe z'Abarabu (UAE) urazamba, nyuma yuko Sudani ishinje iki gihugu cyo mu kigobe cy'Abarabu gufasha RSF, ibyo icyo gihugu gihakana.

Ibiro ntaramakuru Reuters byatangaje ko ibyo birego byakomeje ku wa kabiri, Sudani ivuga ko UAE ari yo yagabye igitero mu mujyi wa Port Sudan mu ntangiriro y'uku kwezi.

UAE yahakanye yivuye inyuma ibyo birego, ivuga ko ari "ibirego bidafite ishingiro".

Kuva intambara yadutse ku itariki ya 15 Mata (4) mu mwaka wa 2023, abantu babarirwa mu bihumbi barapfuye naho abandi babarirwa muri za miliyoni bata ingo zabo – bituma habaho amakuba ya mbere mabi cyane ku isi ajyanye n'imibereho.

Igisirikare n'umutwe wa RSF bashinjwa gukora ibyaha byo mu ntambara. Buri ruhande rurabihakana.