Abahinde babiri barwanira Uburusiya biciwe mu ntambara muri Ukraine

Ubuhinde buvuga ko Abahinde babiri bari barahawe akazi n'igisirikare cy'Uburusiya biciwe mu ntambara ikomeje kuba muri Ukraine.

Minisiteri y'ububanyi n'amahanga y'Ubuhinde yavuze ko yashishikarije abategetsi b'Uburusiya gutahukana imirambo y'abo babiri bapfuye.

Iyo minisiteri yanashishikarije Uburusiya kurekura byihuse no gusubiza mu Buhinde Abahinde bose bari mu gisirikare cy'Uburusiya.

Uburusiya nta cyo buratangaza.

Amakuru avuga ko Abahinde babarirwa muri za mirongo bashutswe n'abakozi b'Uburusiya bakajya kurwana ku ruhande rw'ingabo z'Uburusiya bashukishijwe amafaranga no guhabwa urwandiko rw'inzira (pasiporo) rw'Uburusiya. BBC yavuganye na bamwe muri bo.

Bamwe bavuze ko bahatiwe kujya mu mirimo yo kurwana mu gisirikare cy'Uburusiya. Abandi na bo bagiyemo ku bushake.

Mu itangazo yasohoye, minisiteri y'ububanyi n'amahanga y'Ubuhinde yagize iti: "Tubabajwe no gutangaza ko Abahinde babiri bari barahawe akazi n'igisirikare cy'Uburusiya baherutse kwicirwa mu ntambara ikomeje hagati y'Uburusiya na Ukraine." Ntiyavuze amazina yabo.

Iyo minisiteri yanashishikarije Abahinde "kwigengesera mu gihe cyo gushaka akazi mu Burusiya".

Muri Gicurasi (5) uyu mwaka, polisi y'Ubuhinde yataye muri yombi abantu bane bavugwa ko bafite aho bahuriye n'igico cy'abakora ubucuruzi bwa magendu y'abantu, bacyekwaho gushuka abasore bakajya mu Burusiya, bizezwa imirimo cyangwa kujya kuhiga, bikarangira bahatiwe kurwana muri Ukraine.

Abandi Bahinde nibura babiri barapfuye muri uyu mwaka ubwo barwanaga ku ruhande rw'ingabo z'Uburusiya.

Nubwo bwashishikarije Uburusiya gutahukana Abahinde bari mu gisirikare cy'Uburusiya, Ubuhinde bwanze kwamagana igitero gisesuye cy'Uburusiya muri Ukraine, cyatangiye muri Gashyantare (2) mu 2022, ahubwo bushishikariza impande zombi gushaka amahoro binyuze mu biganiro na dipolomasi.

Hagati aho, mu mezi ya vuba aha ashize Nepal na Sri Lanka byaburiye abaturage babyo kudashukwa n'ibyo bizezwa bitari ukuri by'abakora ubucuruzi bwa magendu y'abantu.

Ni nyuma yuko bigaragaye ko abaturage babarirwa mu magana b'ibyo bihugu barimo kurwana muri iyo ntambara nk'abacanshuro.

Nepal ivuga ko Abanya-Nepal nibura 20 bapfiriye mu ntambara barwana ku ruhande rw'Uburusiya.

Nibura 16 bahoze ari abasirikare ba Sri Lanka bamaze kwicirwa muri iyo ntambara kugeza ubu, benshi muri bo barwanaga ku ruhande rw'igisirikare cy'Uburusiya.

Ku wa mbere, Minisitiri w'ububanyi n'amahanga wa Sri Lanka Ali Sabry yavuze kuri icyo kibazo ubwo yahuraga i Moscow na mugenzi we w'Uburusiya Sergei Lavrov, nkuko iyo minisiteri ibivuga.

Iyo minisiteri yongeyeho ko bemeranyijwe ko "nta kandi kazi kazahabwa Abanya-Sri Lanka" mu gisirikare cy'Uburusiya.