Venezuela: Imfungwa za politiki zatangiye kurekurwa bahereye kuri umwe mu banengaga cyane Maduro

Inyandiko gusa
Rocío San Miguel ni umunyamategeko, akaba inzobere mu by'umutekano n'impirimbanyi y'uburenganzira bwa muntu yabanje kuburirwa irengero mu gihe cy'iminsi 10

Ahavuye isanamu, El Nacional

Insiguro y'isanamu, Rocío San Miguel ni umunyamategeko, akaba inzobere mu by'umutekano n'impirimbanyi y'uburenganzira bwa muntu umwaka ushize yabanje kuburirwa irengero mu gihe cy'iminsi 10 mbere y'uko leta ya Maduro igaragaza ko yamufunze
    • Umwanditsi, Will Grant
    • Igikorwa, Central America correspondent
    • Umwanditsi, Olivia Ireland

Guverinoma ya Venezuela yatangiye kurekura abantu bari bafunzwe, imiryango iharanira uburenganzira bwa muntu ikaba ibafata nk'imfungwa za politiki, mu gikorwa abategetsi bise "cyiza" kigaragaza ubushake bwabo mu gutera intambwe igana ku mahoro.

Mu barekuwe bwa mbere harimo Rocío San Miguel umunyapolitiki uharanira uburenganzira bwa muntu muri Venezuela, nk'uko byemejwe n'umuryango we.

Ibi bibaye nyuma y'uko Leta Zunze Ubumwe za Amerika zifashe Perezida wa Venezuwela, Nicolás Maduro, bamukuye mu rugo rwe mu murwa mukuru Caracas ku wa Gatandatu bakamujyana i New York kuburanishwa ku byaha ashinjwa na Amerika byo gucuruza ibiyobyabwenge.

Kurekura imfungwa za politiki muri Venezuwela byari bimaze igihe kirekire bisabwa na Leta Zunze Ubumwe za Amerika.

Jorge Rodríguez, ukuriye Inteko Ishinga Amategeko ya Venezuela akaba na musaza w'umukuru w'igihugu w'agateganyo Delcy Rodríguez, yatangaje kuri televiziyo ya leta ko "umubare munini" w'izo mfungwa, uhita urekurwa ako kanya.

Ntiyigeze atangaza umubare nyawo cyangwa amazina y'abazarekurwa.

N'ubwo hari imfungwa nyinshi za politiki muri gereza za Venezuela, kugeza ubu byitezwe ko hari burekurwe bacye ugereranyije n'abafunze.

Jorge Rodríguez yavuze ko uku rurekurwa kugamije guteza imbere "ubumwe bw'igihugu n'imibereho y'amahoro".

Skip Ibisomwa cane and continue reading
Ibisomwa cane

End of Ibisomwa cane

Umwe mu ba mbere byemejwe ko barekuwe, Rocío San Miguel, wanengaga cyane ubutegetsi bwa Maduro, yari afunze kuva muri Gashyantare(2) 2024 nyuma yo gufatirwa ku kibuga cy'indege cya Caracas mu murwa mukuru.

San Muguel yabanje kuburirwa irengero mugihe cy'iminsi icumi nyuma umukobwa we yemererwa kujya kumusura muri gereza izwi cyane ya El Helicoide iri i Caracas.

Icyo gihe, yashinjwe umugambi wo kwica Perezida Nicolàs Maduro kandi ahamwa n'ibyaha birimo gutegura iterabwoba, guhuza ibikorwa by'iterabwoba, no kwambura igihugu icyubahiro.

Imiryango y'uburenganzira muntu muri Venezuela ifite abanyamuryango cyangwa abayobozi bafunzwe, yakiranye aya makuru ukwigengesera kwinshi.

N'ubwo Delcy Rodríguez ari umwe mu bari bakomeye muri leta ya Maduro, ubutegetsi bwe bw'agateganyo bwagaragaje ubushake bwo gukorana na Leta Zunze Ubumwe za Amerika, ndetse butangaza byinshi ku hazaza ha Venezuela.

Itsinda ry’abigaragambya, rigizwe cyane n’abagore, rifite ibayapa n'urumuri mu ntoki baragaragaza amarangamutima basaba ko abafunzwe ku mpamvu za politiki muri Venezuela barekurwa

Ahavuye isanamu, EPA

Insiguro y'isanamu, Abigaragambya muri Kolombiya barasaba ko imfungwa za politiki muri Venezuela zirekurwa
Skip podcast promotion and continue reading
WhatsApp channel ya BBC Gahuza

Amakuru ya BBC Gahuza ako kanya kuri WhatsApp yawe

Kanda hano ujyeho

End of podcast promotion

Perezida Donald Trump aheruka gutangaza ko gereza ya El Helicoide, izwiho gufungirwamo abantu ku mpamvu za politike, izafungwa nyuma yo gufatwa kwa Maduro.

Iyo gereza izwi ku rwego mpuzamahanga kubera gufungirwamo abatavuga rumwe n'ubutegetsi n'abakekwaho kuba abanzi ba Leta.

Imiryango y'uburenganzira bwa muntu yakunze kuvuga ko inakorerwamo iyicarubozo, aho abahafungiye bakubitwa, bagacomekwaho amashanyarazi n'indi migenzereze y'ihohoterwa.

Itsinda ry'Abanyavenezuela barengera uburenganzira bwa muntu Provea ryatangaje ko gufunga El Helicoide bitagomba gutuma abantu birengagiza izindi gereza na zo zifungiyemo abarengana hirya no hino mu gihugu.

Undi wo mu batavuga runwe n'ubutegetsi wanahawe igihembo cyitiriwe amahoro cya Nobel, Maria Corina Machado, ufite inshuti nyinshi zafunzwe, ntiyahwemye gusaba ko zafungurwa.

Mu kiganiro yagiranye na televiziyo ya Fox News, Trump yavuze ko Machado ateganyijwe kuza muri Amerika mu cyumweru gitaha ariko ntihavugwa umunsi nyirizina azaziraho.

Mu kiganiro n'uwo munyamakuru wakiriye Trump kuri Fox News, Machado yari yavuze ko ashaka guha Perezida Trump "igihembo cye cya Nobel cy'amahoro".

Uyu munyamakuru yaboneyeho kubaza Perezida Trump icyo avuga kuri icyo cyifuzo, maze Trump amusubiza ko "byaba ari icyubahiro gikomeye".

Abatavuga rumwe n'ubutegetsi muri Venezuela hamwe n'imiryango iharanira uburenganzira bwa muntu baherutse kuvuga ko leta yakoresheje gufungwa kw'abantu mu myaka myinshi mu rwego rwo gutera ubwoba abatavuga rumwe na yo no gucecekesha abayinenga.

Nyuma y'amatora yo muri 2024 yakuruye amakimbirane akomeye, abatavuga rumwe n'ubutegetsi bemeza umubare w'imanza zibasira abanyamakuru n'abaharanira uburenganzira bwa muntu n'abatavuga rumwe na leta, watumbagiye.

Umushinjacyaha Mukuru Tarek Saab n'abandi bategetsi ba leta ibyo barabihakanye, bashimangira ko Venezuela nta mfungwa za politiki ifite, ko abafunzwe ari abakoreze ibyaha bihanwa n'amategeko ya Venezuela.