Silvio Berlusconi wabaye minisitiri w'intebe w'Ubutaliyani yapfuye

Silvio Berlusconi, wahoze ari minisitiri w’intebe w’Ubutaliyani, yapfuye ku myaka 86.

Berlusconi yavuzwe cyane mu birego by’ubusambanyi na ruswa ari ku butegetsi ariko aza kubinesha agaruka muri politike.

Yaguye mu bitaro by’i Milan, nk’uko ibinyamakuru byaho bibitangaza.

Mu kwezi kwa Mata(4) yavuwe ‘infection’ y’ibihaha ifitanye isano n’indwara itaravuzwe mbere yari arwaye ya kanseri yo mu maraso, izwi nka leukaemia.

Yari umuherwe utunze za miliyari washoye imari mu itangazamakuru, yageze ku butegetsi bwa mbere mu 1994 ayobora guverinoma enye kugeza mu 2011.

Muri Nzeri(9) ishize yatorewe kuba umusenateri, nyuma yo gufatanya n’amashyaka yagejeje ku butegetsi Giorgia Meloni, minisitiri w’intebe w’Ubutaliyani.

Avuga kuri iyi nkuru, Minisitiri w’ingabo z’Ubutaliyani Guido Crosetto yavuze ko urupfu rwa Berlusconi ari “icyuho kinini cyane”.

Yanditse kuri Twitter ati: “Igihe [cye] kirarangiye…Urabeho Silvio”, yongeraho ko yakundaga Berlusconi “cyane”.

Umutoza wa Real Madrid Carlo Ancelotti, watsindiye igikombe cya Champions League inshuro ebyiri ari umutoza wa AC Milan ubwo Berlusconi yari nyirayo, yatangaje kuri Twitter ubutumwa bwo kumuha icyubahiro.

Yanditse ati: "Akababaro k'uyu munsi ntigahanagura ibihe by'ibyishimo twagiranye". Yise Berlusconi "umugabo w'indahemuka [udatezuka ku ijambo rye], w'umunyabwenge, w'umunyakuri", wabaye ishingiro ry'urugendo rw'umupira we nk'umukinnyi n'umutoza.