Ubwato bw’agatangaza bw’Uburusiya bwafatiriwe bugiye gutezwa cyamunara

Ubwato (superyacht) bwo mu Burusiya bw’agaciro ka miliyoni 75$ buzatezwa cyamunara nyuma y’uko nyirabwo yafatiwe ibihano.

Ubu bwato bw’agatangaza buzwi nka Axioma bwafatiwe mu muhora wa Gibraltar muri Werurwe(3) nyuma y’uko banki ya JP Morgan yo muri Amerika ivuze ko nyirabwo, Dmitrievich Pumpyansky, atishyuye umwenda wa miliyoni $20m.

Ubu bwato bufite uburebure bwa metero 72 buzagurishwa kuwa kabiri, kuko buzagurishwa muri cyamunara y’umunsi umwe, byitezwe ko buzagurwa ku giciro kiri munsi y’agaciro kabwo.

Ubu bwato bunini bushobora gutuza ahisanzuye abantu 12 mu bice bitandatu byabwo.

Bufite ‘piscine’, jacuzzi, spa, 3D Cinema, ibikoresho bya ‘scuba diving’ n’umwanya w’abakozi 20 babwo.

Nibwo bwato bwa mbere bw’igitangaza bugiye kugurishwa kuva bamwe mu bikomerezwa mu Burusiya bafatiwe ibihano, nyuma y’uko Moscow iteye Ukraine muri Gashyantare(2).

Hari abahamagarira za leta kugurisha imitungo yafatiriwe y’abaherwe b'abarusiya bari hafi y’ubutegetsi kugira ngo ifashe impunzi za Ukraine.

Gusa, amafaranga azava ku igurishwa rya Axioma byitezwe ko ari aya JP Morgan.

Nubwo bwari bwarafatiriwe, ubu bwato – bwabanje kwitwa Red Square bucyubakwa mu 2013 – muri iki gihe bwashoboraga gukodeshwa n’abifite ku $550,000 ku cyumweru kimwe.

Nyirabwo niwe nyiri uruganda rukora ibitembo by’ibyuma rwa OAO TMK, rubigurisha ku ruganda rwa leta rw’ingufu rwa Gazprom.

Uwo mugabo w’imyaka 58, umutungo we ubarirwa kuri miliyari $2.1, ari ku rutonde rw’abafatiwe ibihano n’Ubwongereza, Amerika, n’Ubumwe bw’Uburayi.