'Tanzania, Uganda niba twarabakoshereje mu buryo ubwo ari bwo bwose turasaba imbabazi' – Ruto

Perezida William Ruto wa Kenya yasabye imbabazi ibihugu bituranyi bya Tanzania na Uganda mu kugerageza gutuza umwuka mubi uri kuvugwa hagati y'ibi bihugu byo muri Afurika y'iburasirazuba.

Mu masengesho azwi nka National Prayer Breakfast ku wa gatatu, Ruto yasabye ko umubano waba mwiza, ko Kenya iri mu rugendo rwo "kwiyubaka bushya".

Yagize ati: "Ku baturanyi bacu ba Tanzania, niba twarabakoshereje mu buryo ubwo ari bwo bwose, turasaba imbabazi. Kuri bagenzi bacu ba Uganda, niba hari ikintu Abanyakenya bakoze kidakwiriye, turashaka gusaba imbabazi".

Ruto yavuze ibi mu gihe hari umwuka mubi kuva Tanzania yakwirukana nabi impirimbanyi zo muri Kenya na Uganda zari zagiye muri icyo gihugu gukurikirana urubanza rwa Tundu Lissu utavugarumwe n'ubutegetsi bwa Perezida Samia Suluhu.

Mu birukanwe muri Tanzania harimo Martha Karua umunyamategeko ukomeye kandi wahoze ari minisitiri w'ubutabera wa Kenya na bagenzi be bari bamuherekeje.

Karua, umunyamategeko wubashywe mu by'uburenganzira bwa muntu ni umwe mu bakomeye bamagana ko demokarasi irimo gusubira inyuma mu burasirazuba bwa Afurika.

Karua amaze igihe yunganira mu mategeko Kizza Besigye, umunya-Uganda utavugarumwe n'ubutegetsi washimutiwe muri Kenya umwaka ushize agasubizwa mu gihugu cye aho aregwa ubugambanyi. Kimwe na Lissu, Besigye na we ahakana ibyo aregwa, avuga ko bishingiye ku mpamvu za politike.

Impirimbanyi yo muri Kenya, Boniface Mwangi na mugenzi we wo muri Uganda Agather Atuhaire bafunzwe iminsi muri Tanzania mbere y'uko bajugunywa hafi y'imipaka y'ibihugu byabo na Tanzania.

Ibi byateye guterana amagambo gukomeye hagati y'ibi bihugu ku bakoresha imbuga nkoranyambaga mu gihe hasanzwe hari ukutavugarumwe kuri politike zo mu karere n'ibikorwa by'impirimbanyi.

Abadepite bo mu bihugu bya Kenya na Tanzania na bo bagarutse kuri izi mpaka n'ibyabaye berekana ibibazo byateye mu mibanire y'ibi bihugu.

Aba-Gen Z na bo yabasabye imbabazi

Perezida Ruto yasabye imbabazi kandi urubyiruko rwa Kenya rukomeje kugaragaza ko rutabona ibintu kimwe na leta kuva mu gihe cy'imyigaragambyo ikomeye yo mu mwaka ushize yamaganaga uko leta yashakaga kuzamura imisoro.

Ruto yagize ati: "Ku bana bacu, niba twarabakoshereje, turasaba imbabazi. Turashaka kubaka umubano uzakomeza igihugu cyacu".

Uyu mukuru w'igihugu yasabye Abanyakenya gushyigikira imihate iriho yo gusubiranya imibanire myiza, ko ubutegetsi bwe bugamije kunga Kenya no kuyiteza imbere.

Ati: "Ndasaba ko dufatanya, turwanye ubukene kandi duharanire guteza imbere igihugu cyacu".