Umufaransakazi w'imyaka 86 yafunzwe na ICE nyuma yo kwimukira muri US kongera guhura n'umukunzi wa cyera

Umugore w'Umufaransa w'imyaka 86 wimukiye muri Amerika mu mwaka ushize nyuma yo kongera kubyutsa urukundo rwo mu myaka ya 1960, afungiye mu kigo cy'abinjira n'abasohoka muri Leta ya Louisiana.

Umuhungu wa Marie-Thérèse, ukomoka mu mujyi wa Nantes, yatangiye gutabaza nyuma y'uko nyina afatiwe i Anniston, muri Alabama, mu ntangiriro z'ukwezi kwa kane.

Yabwiye ikinyamakuru cy'Abafaransa Ouest-France ati: "Bamushyizeko amapingu ku maboko no ku maguru nk'aho ari umunyabyaha ruharwa (uteje akaga.)"

Ishami ry’Amerika rishinzwe umutekano w'imbere mu gihugu (Department of Homeland Security), rigenzura urwego rw‘abinjira n’abasohoka , ryabwiye BBC ko "umunyamahanga utari mu gihugu mu buryo bwemewe" ukomoka mu Bufaransa uhuye n'izina rya Marie-Thérèse yinjiye muri Amerika muri Kamena (ukwa 6) 2025 akarenza igihe cya viza ye cy'iminsi 90.

Nk'uko umuhungu we abivuga, Marie-Thérèse yari ategereje kubona green card igihe yafungwaga.

Marie-Thérèse yari yimukiye muri Amerika nyuma yo gushyingiranwa n'umukunzi we bari baraburanye, Umunyamerika witwa Billy, bahuriye bwa mbere mu myaka ya 1960 ubwo Billy yari umusirikare ukorera ku birindiro bya NATO i Saint-Nazaire, naho we (Marie Therese) ari umunyamabanga.

Billy yasubiye muri Amerika mu 1966. Nyuma yaho, we na Marie-Thérèse baraburanye, buri wese arashaka mu gihugu cye anabyara abana.

Bongeye guhura mu 2010, barasurana bari kumwe n'abo bashakanye, nk'uko byatangajwe na Ouest-France.

Mu 2022, bombi bari bamaze gupfusha abo bashakanye, bahita batangira gukundana. Umuhungu wa Marie-Thérèse yavuze ko Billy yari "umugabo mwiza kandi ushimishije cyane", kandi ko bakundanaga "nk'abakiri bato".

Bashyingiranywe umwaka ushize, Marie-Thérèse yimukira muri Alabama atangira gusaba green card (uruhushya rw'igihe kirekire ) rwamwemerera kuguma muri Amerika.

Igihe Billy yapfaga mu buryo butunguranye muri Mutarama (ukwezi kwa1), Marie Therese ntiyari bwabone iyo green card,bituma uko ari mu gihugu byongera kuba ikibazo kidasobanutse.

Nyuma gato y'urupfu rwa Billy, umuhungu we na Marie-Thérèse bagiranye amakimbirane ku bijyanye n'umurage.

Umuhungu wa Billy "ntiyamuhaye agahenge, amutoteza, ndetse anagera aho amucira amazi, internet n'amashanyarazi," nk'uko umuhungu wa Marie-Thérèse yabibwiye Ouest-France.

Marie-Thérèse yahise ashaka umunyamategeko, ariko afatwa na ICE umunsi umwe mbere y'iburanisha ryari riteganyijwe. Abaturanyi ni bo bamenyesheje abana be ibyabaye.

Nta gihamya igaragaza ko ari umuhungu wa Billy watanze amakuru yatumye mukase ajyanwa mu kigo cya ICE gifungirwamo abimukira.

Minisiteri y'Ububanyi n'Amahanga y'u Bufaransa iri gukurikirana iki kibazo, kandi Marie-Thérèse yamaze gusurwa n'umukozi w‘Ambassade, nk'uko umuhungu we yabibwiye itangazamakuru ryo mu Bufaransa. Yongeyeho ko nyina ari "intwari" kandi "akomeje kwihangana neza", nubwo afite ibibazo by'umutima n'umugongo.

Yagize ati: "Icyo dushyize imbere ni ukumukura muri iki kigo afungiwemo no kumusubiza mu Bufaransa. Urebye uko ubuzima bwe bumeze, ntiyashobora kumara ukwezi muri ubu buzima bwo gufungwa."

Kuva Donald Trump yatangira manda ye ya kabiri, urwego rwa ICE rwahawe uruhare rukomeye mu gushyira mu bikorwa gahunda ya leta ye yo kohereza abimukira badafite ibyangombwa mu bihugu byabo.

Ingengo y'imari n'inshingano z'uru rwego byarongerewe cyane, kandi rufite uruhare runini mu gukura muri Amerika abimukira badafite ibyangombwa.

Umuhungu wa Marie-Thérèse yavuze ko ibyabaye bisa "n'inkuru mbi yo muri filime y'Abanyamerika. Buri gitondo ndakanguka nkibwira ko atari ukuri, ko ari inzozi mbi gusa."