DR Congo n'u Rwanda byahaye Amerika umushinga w'amahoro – 'ni intambwe ikomeye'

U Rwanda na DR Congo, buri ruhande rwahaye Leta Zunze Ubumwe za Amerika inyandiko zikubiyemo ibyo bifuza kuba biri mu masezerano y'amahoro hagati y'ubutegetsi bw'ibi bihugu, nk'uko byemezwa n'umujyanama wa Trump.

Massad Boulos yatangaje ko iyi ari "intambwe ikomeye ku kuzuza" ibyo biyemeje mu mirongo migari impande zombi ziheruka gusinya.

Biteganyijwe ko hagati muri uku kwezi abashinzwe ububanyi n'amahanga ba DR Congo n'u Rwanda bahura na mugenzi wabo Marco Rubio wa Amerika kugira ngo bahurize hamwe inyandiko y'ibizaba bigize amasezerano y'amahoro.

Ibikubiye mu nyandiko z'umushinga w'amahoro zatanzwe na buri ruhande kugeza ubu ntabwo bizwi neza.

Ubutegetsi bwa Kinshasa bushinja ubwa Kigali gufasha umutwe wa M23 ubu ugenzura ibice bitandukanye mu ntara za Kivu ya Ruguru na Kivu y'Epfo ndetse n'imirwa mikuru y'izi ntara, Goma na Bukavu.

Kigali ishinja Kinshasa gufatanya n'umutwe wa FDLR urwanya ubutegetsi bw'u Rwanda.

Mu muhate wo guhuza ibihugu byombi, Amerika ivuga ko impungenge za buri ruhande – Kinshasa isaba kuvana ingabo z'u Rwanda muri DR Congo, Kigali igasaba gusenya umutwe wa FDLR – zigomba kurebwaho no kubahirizwa muri ayo masezerano y'amahoro.

Washington kandi ivuga ko izi mpande zombi nizigera ku masezerano y'amahoro azakurikirwa n'ishoramari rya miliyari z'amadorari za kompanyi z'Abanyamerika mu bucukuzi n'ubucuruzi bw'amabuye y'agaciro muri DR Congo n'u Rwanda.

Abatavuga rumwe n'ubutegetsi bwa Kinshasa banenze uyu muhate wa Washington bavuga ko uheza Abanyecongo kandi ko urimo byinshi bitari mu mucyo.

Mu butumwa yashyize ku rubuga X, Massad Boulos yavuze ko yizeye umuhate impande zombi zikomeje "wo kugera ku mahoro".

Imirwano iracyavugwa hato na hato

Mu gihe haciye iminsi haboneka agahenge kagereranyije mu ntara za Kivu ya Ruguru na Kivu y'Epfo, imirwano yongeye kuvugwa mu mpera z'icyumweru gishize no kuri uyu wa mbere mu bice bitandukanye by'izi ntara.

Mu mirwano yabaye mu mpera z'icyumweru, umutwe wa M23 wigaruriye agace ka Lunyansenge kari hafi y'ikiyaga cya Rwicanzige kizwi kandi nka Lake Edward muri teritwari ya Lubero ya Kivu ya Ruguru.

Igisirikare cya FARDC cyatangaje ko cyamaganye ubwo bushotoranyi bwa M23 mu gihe hari umuhate w'amahoro urimo gukorwa, kandi kivuga ko gifite uburenganzira bwo kwihorera, nk'uko bivugwa n'ibiro ntaramakuru bya Congo, ACP.

Imirwano yavuzwe kandi ku wa mbere mu duce dutandukanye muri teritwari za Rutshuru na Masisi z'intara ya Kivu ya Ruguru hagati ya Wazalendo na M23.

Buri ruhande rushinja urundi kuba ari rwo rushoza imirwano muri iki gihe hari kuba ibiganiro byo gushaka amahoro.

Umutwe wa M23 ntabwo watumiwe mu biganiro bya Washington, nubwo abawuvugira bumvikanye bavuga ko bashishikajwe n'inzira iyo ari yo yose yageza ku mahoro.

Byitezwe ko nyuma y'uko ba minisitiri b'ububanyi n'amahanga bumvikanye ku masezerano y'amahoro, azashyirwaho umukono na ba Perezida Paul Kagame na Felix Tshisekedi muri White House, nk'uko byatangajwe n'uruhande rwa Washington.

Icyitezwe na benshi ni ukumenya icyo ayo masezerano y'amahoro azaba ateganya ku bagize umutwe wa M23 ndetse n'ibice bagenzura ubu.

Amasezerano ameze nk'aya yasinywe mu myaka yo hambere, yashyiraga inyeshyamba mu ngabo za leta, akavuga ku gucyura impunzi z'Abanyecongo, cyangwa kurandura imitwe yitwaje intwaro nka FDLR, ariko ntiyagiye yubahirizwa byuzuye uko yasinywe.