Paul Biya w'imyaka 92 yavuze ko aziyamamaza, arashaka manda ya 8

Perezida Paul Biya wa Cameroun w'imyaka 92, ni we kandi mukuru w'igihugu ukuze kurusha abandi ku isi, yatangaje ko aziyamamaza mu matora azaba mu'Ukwakira(10) k'uyu mwaka.

Mu itangazo yashyize ku mbuga nkoranyambaga mu ijoro ryacyeye, yavuze ko ashaka indi manda – izaba ari iya munani – kubera "kubisabwa na benshi cyane bo mu turere icumi tw'igihugu cyacu n'abo muri 'diaspora'."

Yanditse ati: "Ndi umukandida mu matora ya perezida yo ku wa 12 Ukwakira"

Yongeraho ati: "Mwizere ko ubushake bwanjye bwo kubakorera bujyanye n'uburyo ibibazo duhanganye na byo bikomeye".

Ubutegetsi bwa Paul Biya, agiye kumaraho imyaka 43, bwakomeje kunengwa ruswa, kunyereza umutungo wa leta, imiyoborere mibi, no kunanirwa gukemura ibibazo by'umutekano.

Kwiyamamaza kwe gukurikiye gushwana na bamwe mu bahoze ari inkoramutima ze muri politike zo mu gace k'amajyaruguru ya Cameroun zagiye zimufasha gutsinda amatora yabanje.

Biya ntaratsindwa amatora na rimwe, naramuka atsinze n'aya yimirijwe azategeka indi myaka irindwi, ishobora kurangira abura umwaka umwe ngo yuzuze imyaka 100.

Mbere y'uko atangaza iki cyemezo, muri Cameroun no hanze hari benshi bari bakomeje gusaba ko ahigama akava ku butegetsi akareka hakaza abakiri bato.

Azahatana n'abari inkoramutima ze

Mu munsi ya vuba aha bamwe mu bari hafi cyane ye muri politike bavuye mu ruhande rwe batangaza ko na bo bashaka kwiyamamaza.

Issa Tchiroma Bakary, wahoze ari inshuti ye y'igihe kirekire, mu kwezi gushize yeguye muri guverinoma avuga ko agiye kwiyamamaza kugira ngo azavane Biya ku butegetsi.

Tchiroma yavuze ko ubutegetsi bwa Biya "bwagambaniye" icyizere bwahawe na rubanda, nuko ahitamo kujya mu ishyaka risanzwe ritavugarumwe na bwo.

Bello Bouba Maigari minisitiri w'ubukerarugendo na we wabaye umusangirangendo wa Biya igihe kirekire, mu mpera z'ukwezi gushize na we yatangaje ko aziyamamaza.

Aba babiri bari ingenzi mu butegetsi bwa Biya, bombi bakomoka mu majyaruguru y'igihugu.

Ku rundi ruhande, Maurice Kamto, na we wahoze ari minisitiri nyuma akaza kuba utavugarumwe n'ubutegetsi bwa Yaoundé, mu matora aheruka yabaye uwa kabiri.

Kamto yafunzwe amezi icyenda nyuma y'uko yamaganye ibyavuye mu matora ya 2018.

Abategetsi bashinje Kamto kugumura rubanda kubera imyigaragambyo yateguwe n'abamushyigikiye, bemezaga ko ayo matora yaranzwe no kwibira amajwi Biya. Ibyo leta yahakanye.

Kamto na we aheruka gutangaza ko azongera agahatana na Biya mu matora yo m'Ukwakira.