Uburusiya bwakatiye Umwongereza warwanye muri Ukraine gufungwa imyaka 13

Ibiro by'umushinjacyaha mukuru w'Uburusiya byatangaje ko Umwongereza warwanye muri Ukraine yakatiwe igihano cyo gufungwa imyaka 13 muri gereza icunzwe cyane.

Hayden Davies, wahoze ari umusirikare w'Ubwongereza, Uburusiya bwise umucanshuro, amakuru avuga ko yafatiwe mu karere ka Donbas muri Ukraine mu mpera y'umwaka wa 2024 cyangwa mu ntangiriro y'uyu mwaka wa 2025, ubwo yarwanaga mu mutwe wa gisirikare ugizwe n'abanyamahanga urwana ku ruhande rw'ingabo za Ukraine.

Yaburanishirijwe mu rukiko rugenzurwa n'Uburusiya rwo mu mujyi wa Donetsk, ubu wigaruriwe n'Uburusiya.

Minisiteri y'ububanyi n'amahanga y'Ubwongereza (FCDO) yavuze ko yamaganye bikomeye ikatirwa rya Davies rishingiye "ku birego by'ibinyoma", yongeraho ko ari imfungwa yo mu ntambara.

Iyo minisiteri yagize iti: "Dukomeje kuvugana n'umuryango wa Bwana Davies kandi turimo gutanga ubufasha bw'ambasade."

FCDO yavuze ko mu mategeko mpuzamahanga, imfungwa zo mu ntambara zidashobora kuburanishwa ku kujya mu mirwano.

Yongeyeho iti: "Turasaba ko Uburusiya bwubahiriza izi nshingano, zirimo n'izo mu masezerano y'i Geneva [Genève], no kureka gukoresha imfungwa zo mu ntambara ku mpamvu za politike n'icengezamatwara."

Mu itangazo basohoye, abashinjacyaha bo mu Burusiya bavuze ko Davies yinjiye mu ngabo za Ukraine muri Kanama (8) mu mwaka wa 2024 ndetse ko "yitabiriye ibikorwa bya gisirikare byo kurwanya ingabo z'Uburusiya ku butaka [bw'akarere ka Donetsk]".

Mu mashusho yo mu rukiko yatangajwe n'abashinjacyaha, umugabo uvuga Icyongereza mu mivugire yo mu Bwongereza yumvikana avuga, amagambo ye agasemurwa, ari mu kazu ka wenyine kazitiwe, ibyo bikaba ari imikorere isanzwe mu manza nyinshi zo mu Burusiya.

Uwo mugabo yavuze ko yari mu mutwe w'abanyamahanga wo mu ngabo za Ukraine ndetse ko yagiye muri Ukraine mu modoka ya bisi anyuze muri Pologne.

Yavuze ko yahembwaga amadolari y'Amerika 400 (arenga gato 580,000FRW) cyangwa amadolari y'Amerika 500 (arenga gato 725,000FRW) nk'umushahara w'ukwezi. Abajijwe niba yemera ikirego, uwo mugabo yavuze ngo "yego" ndetse anikiriza akoresheje umutwe.

Ntibisobanutse niba yavugaga yashyizweho agahato.

Mbere muri uyu mwaka, minisiteri y'ububanyi n'amahanga y'Ubwongereza yanenze urubanza rwaciriwe James Anderson, undi Mwongereza wafashwe arwana ku ruhande rw'ingabo za Ukraine, nyuma yuko akatiwe gufungwa imyaka 19 ahamijwe iterabwoba hamwe n'igikorwa cy'ubucanshuro.

Uwo w'imyaka 22 ni we wabaye Umwongereza wa mbere uhamijwe ibyaha n'Uburusiya muri iyi ntambara.