Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Xi yabwiye Trump ati: "Witonde" mu guha intwaro Taiwan
Perezida Xi Jinping w'Ubushinwa mu kiganiro kuri telefone yabwiye mugenzi we Donald Trump wa Amerika ko Taiwan ari cyo "kibazo gikomeye kurusha ibindi" mu mubano w'ibihugu byabo bombi.
Xi yasabye Trump "kwitonda" mu guha intwaro iki kirwa, nk'uko itangazamakuru rya leta y'Ubushinwa ribivuga, yongeraho ko yizeye ko Washington na Beijing bizabona inzira yo gukemura ibibatandukanya.
Trump yavuze ko iki kiganiro cyo ku wa gatatu kuri telefone cyari "cyiza cyane", ari "kirekire kandi kimbitse".
Iki kiganiro gikurikiye uruzinduko mu Bushinwa rwa bamwe mu bategetsi b'ibihugu by'iburengerazuba muri aya mezi ashize, barimo na Minisitiri w'intebe w'Ubwongereza, aho bashaka gusubiranya umubano n'iki gihugu cya kabiri mu bukungu bunini ku isi.
Trump na we biteganyijwe ko muri Mata(4) azasura Ubushinwa, uruzinduko yavuze ko yiteze cyane.
Yavuze ko Beijing ubu irimo kureba niba yagura toni miliyoni 20 z'umusaruro wa soya wa Amerika, ibyaba ari inyongera kuko Ubushinwa busanzwe bugurayo toni miliyoni 12.
Trump yanditse ku rubuga rwe Truth Social ati: "Umubano n'Ubushinwa, n'umubano wanjye bwite na Perezida Xi, ni mwiza cyane, kandi twembi tuzi uburyo ari ingenzi kubigumisha gutya".
Uretse Taiwan na soya, Trump na Xi baganiriye no ku ntambara y'Uburusiya muri Ukraine, uko ibintu byifashe muri Iran, no kuba Ubushinwa bwagura ibitoro bya Amerika, nk'uko Trump yabyanditse.
Kuri Taiwan, Xi yavuze ko iki kirwa gifite ubutegetsi bwacyo cyahoze ari "ubutaka bw'Ubushinwa" kandi Beijing "igomba kurengera ubusugire bwayo [Taiwan] n'imbibi zayo".
Yaburiye ko Amerika "igomba gukemura ikibazo cyo kugurisha intwaro Taiwan yitonze".
Ubushinwa bwakomeje kwifuza gusubirana Taiwan kandi ntabwo bwigeze bukuraho ingingo yo gukoresha imbaraga.
Amerika ifitanye umubano wemewe n'Ubushinwa, ariko Taiwan nubwo ntawo bafitanye wemewe yakomeje kuba inshuti ya hafi ya Amerika, ndetse iri mu bihugu Amerika igurishaho intwaro nyinshi.
Mu Ukuboza(12), ubutegetsi bwa Trump bwatangaje ko bwagurishije Taiwan intwaro z'agaciro ka miliyari 11$ ziganjemo za roketi na za misile ziraswa kure kandi z'amoko atandukanye
Icyo gihe, Beijing yavuze ko uku "kugerageza gufasha [Taiwan] kwigenga" nta kindi kuzatera uretse kwongera ubushyamirane kandi bishobora guteza intambara mu karere ka Taiwan.
Ku wa gatatu kuri telephone Xi yabwiye Trump ati: "Nk'uko Amerika ifite impungenge zayo, n'Ubushinwa bufite impungenge zabwo.
"Impande zombi nizikorana zumvikana mu buryo bwo kubahana n'inyungu za twese, nta kabuza dushobora kubona inzira zo gukemura impungenge za buri ruhande".
Ku wa kane, Lai Ching-te umukuru w'ikirwa cya Taiwan yabwiye abanyamakuru ko umubano wabo na Amerika 'ugikomeye nk'ibuye" kandi "imishinga yose y'ubufatanye ikomeje".
Ubushinwa na Taiwan: Iby'ibanze
- Kuki Ubushinwa na Taiwan bifitanye umubano mubi? Ubushinwa na Taiwan byatandukanyijwe mu gihe cy'intambara yo gusubiranamo kw'abaturage yo mu myaka ya 1940, ariko Ubushinwa bushimangira ko icyo kirwa hari igihe kizagera bukacyisubiza, no ku ngufu bibaye ngombwa
- Taiwan itegetswe gute? Iki kirwa gifite itegekonshinga ryacyo, abategetsi batowe binyuze mu buryo bwa demokarasi, ndetse gifite ingabo zigizwe n'abasirikare hafi 300,000
- Ni nde wemera Taiwan? Ibihugu bicyeya gusa ni byo byemera Taiwan. Byinshi byemera leta y'Ubushinwa. Amerika nta mubano uzwi ifitanye na Taiwan, ariko ifite itegeko riyisaba guha icyo kirwa ubushobozi bwo kwirinda ubwacyo.
