Ubwicanyi butagira izina i Kasumbalesa, imirambo irenga 20 yiganjemo abamotari yatowe mu gihuru

Abaturage mu mujyi wa Kasumbalesa mu ntara ya Katanga ya Repubulika ya Demokarasi ya Congo bababajwe kandi batewe ubwoba n'ubwicanyi bwakorewe abantu barenga 20 ku mpamvu zitazwi n'abantu kugeza ubu bataramenyekana neza, nk'uko abategetsi babivuga.

Imirambo y'abantu 23 barimo abagabo 22 n'umugore umwe ni yo yabonetse kuva mu cyumweru gishize kugeza ku wa mbere w'iki cyumweru mu gace kamwe kandi ihishe mu bihuru.

Kasumbalesa ni umujyi uri ku mupaka wa DR Congo na Zambia, ni umujyi w'ubucuruzi bukomeye burimo n'ubw'amabuye y'agaciro kuko uhuza umuhora wa ruguru n'uw'epfo nk'inzira ikomeye y'amabuye y'agaciro hagati ya Zambia na DR Congo.

Jenerali Eddy Kapend ukuriye ingabo mu karere Kasumbalesa irimo yatangarije abanyamakuru iby'imirambo yabonetse, kandi ko hari abantu batawe muri yombi bakekwaho ubu bwicanyi.

Ibinyamakuru muri DR Congo bivuga ko abishwe, bafite ibimenyetso byo kunigwa no gukorerwa irindi yica rubozo, abenshi ari abamotari bazwi muri uyu mujyi wa Kasumbalesa.

Kapend yatangaje ko mu bantu batawe muri yombi bakekwaho ubu bwicanyi yizeye ko nta bapolisi cyangwa abasirikare barimo "kuko igihano kuri bo cyaba gikomeye cyane", yongeraho ko kugeza ubu hataramenyekana ikiri inyuma y'ubu bwicanyi.

Sosiyete sivile muri ako gace yamaganye ubu bwicanyi kandi isaba leta gukora iperereza hakamenyekana ababuri inyuma.

Byamenyekanye gute?

Mu gace kazwi nka Whisky 7 ko muri uyu mujyi ni ho mu cyumweru gishize hatangiye kuboneka imirambo mu bihuru.

Radio Okapi yatangaje ubuhamya bw'umugabo w'umumotari warokotse ubu bwicanyi, avuga uburyo abantu babiri bamuteze ngo abatware bagera ahantu hari inzu zitaruzura bakamuhagarika bagatangira kumunigisha umugozi no kumukubita bikomeye.

Uwo mu motari yavuze ko bamusize mu gihuru bazi ko bamwishe maze azanzamutse abasha kuhivana, yemeza kandi ko aha yakorewe ibi yahabonye indi mirambo myinshi.

Uwo mu motari ni we waburiye bagenzi be ndetse amenyesha igipolisi.

Abategetsi bakuriwe n'umukuru w'umujyi wa Kasumbalesa hamwe n'abashinzwe umutekano bagiye aho hantu, nk'uko ibinyamakuru muri DR Congo bibivuga, imirambo yahabonetse imwe yabashije kumenyekana kubera ibyangombwa.

Amazina y'abamotari bazwi muri uwo mujyi yari yiganje mu mirambo yabonetse, imwe muri yo yashyinguwe ku wa mbere.

Sosiyete sivile muri ako gace ivuga ko abaturage bagifite ubwoba kubera ubu bwicanyi batazi neza icyo bwari bugambiriye n'ababukoze.

Abategetsi bavuga ko bishoboka ko ababukoze ari abajura bagamije kwambura abamotari moto zabo.

Bavuga ko iperereza ryimbitse rigikomeje.