'Igikorwa cya mbere gikomeye mu mikino' – Trump yatangaje tombola y'amatsinda y'igikombe cy'isi

Perezida w'Amerika Donald Trump yatangaje ko tombola y'amatsinda y'igikombe cy'isi cy'umupira w'amaguru mu bagabo cyo mu mwaka wa 2026 izabera i Washington DC mu Kuboza (12) uyu mwaka.

Iryo rushanwa rizabera muri Amerika, Canada na Mexique (Mexico), ndetse rizitabirwa n'amakipe y'ibihugu 48, yiyongereye avuye kuri 32.

Mbere, iyo tombola yari yitezwe kubera mu mujyi wa Las Vegas muri Amerika, ari na ho yari yabereye ubwo Amerika yakiraga irushanwa ryo mu mwaka wa 1994.

Ariko iyo tombola, izaba ku itariki ya 5 Ukuboza, ubu izabera mu kigo Kennedy Center - ikigo kiberamo imyidagaduro, Trump akaba ari we mukuru wacyo.

Trump yagize ati: "Ni cyo gikorwa cya mbere gikomeye cyane, birashoboka ko ari igikorwa cya mbere gikomeye cyane mu mikino."

Perezida w'impuzamashyirahamwe y'umupira w'amaguru ku isi (FIFA), Gianni Infantino, wari witwaje igikombe cy'isi amakipe azahatanira, na we yitabiriye uwo muhango wabaye ku wa gatanu, mu cyumba cyitwa Oval Office cyo mu biro bya perezida w'Amerika (White House), wo gutangaza igihe tombola izabera.

Infantino yagize ati: "Tombola izatangazwa ku isi hose ubwo izaba irimo kuba ndetse izarebwa n'abantu miliyari imwe."

"[Igikombe cy'isi] Kizitabirwa n'amakipe 48. Hazaba imikino 104..."

Infantino yahaye Trump akanya ko guterura icyo gikombe, ubwo bari bari mu kiganiro n'abanyamakuru ku wa gatanu. Trump arabaza ati: "Nshobora kukigumana?"

Iyo tombola izatuma amakipe 48 agabanywa mu matsinda 12, buri tsinda rigizwe n'amakipe ane. Amakipe abiri ya mbere muri buri tsinda, hamwe n'amakipe umunani ya mbere yabonye umwanya wa gatatu, azakomeza mu cyiciro cyo gukuranamo.

Igikombe cy'isi giteganyijwe gutangira ku itariki ya 11 Kamena (6) mu 2026, umukino wa nyuma ukinwe ku itariki ya 19 Nyakanga (7) uwo mwaka.