Musenyeri Welby yidogera abarongoye Anglican muri Uganda bashigikiye itegeko rirwanya ubutinganyi

Umurongozi w’ishengero rya Anglicana ahamagarira abarongoye ishengero muri Uganda kwiyamiriza itegeko rishasha rihana abahuza ibitsina babisangiye riherutse guterwako igikumu na Perezida Yoweri Museveni.

Musenyeri mukuru wa Canterbury, Justin Welby, avuga ko aba-Anglicana badategerezwa gushigikira itegeko avuga ko riteye kubiri n’inyigisho za gikristu.

Ishengero rya Anglicana muri Uganda riri mu mashengero aherutse kwiyamiriza ingingo y’ishengero ry’Ubwongereza rirongowe na Musenyeri mukuru Welby yo guhezagira abatinganyi, ni ukuvuga imibonano mpuzabitsina y'ababisangiye.

Muri Uganda, abagiriwe n'icaha co guhuza ibitsina n’abo babisangiye bashobora gupfungwa ubuzima bwabo bwose, nk’uko biri muri iri tegeko riherutse guterwako igikumu na Perezida Museveni.

Musenyeri mukuru wa Anglicana ari na we arongoye iri shengero kw’isi yose avuga ko yandikiye Musenyeri Stephen Kaziimba arongoye iri shengero muri Uganda, amusigurira “agahinda n’umubabaro” yagize kubona ishengero rishigikira iri tegeko.

Ingingo y’ishengero rya Anglicane mu Bwongereza yo guha umuhezagiro abipfuza kwubakana basangiye ibitsina yateje ubushamirane bukomeye hagati yaryo n’ayandi mashengero atari make kw’isi, harimwo n’ayo ku mugabane wa Afrika.

Mu nama yo mu kwa kane kw’uyu mwaka yabereye i Kigali mu Rwanda, yiswe GAFCON 4-Global Anglican Future Conference ikaba yahuje uruhande rw’abatipfuza impinduka muri iri shengero rya Anglican bavuye mu bihugu 52, muri bo hakaba harimwo abasenyeri bashika 300, banzuye ko ingingo y’ishengero ry’Ubwongereza inyuranye n’ukwemera kwabo.

Mw’iri tegeko rishasha rya Uganda, ubutinganyi bushobora guhanishwa umunyororo w’ubuzima bwose, mu gihe icaha iri tegeko ryita “ubutinganyi burenze urugero”, ibi bigasigura ubwo gukwiragiza umugera wa SIDA, bushobora guhanishwa igihano co gupfa.