Rwanda: Depite weguye yasabye imbabazi avuga ko atazongera kunywa inzoga

Mbonimana Gamariel, umudepite uherutse kwegura mu nteko ishingamategeko y’u Rwanda, yatangaje ubutumwa bwo gusaba imbabazi abanyarwanda kubera “gutwara imodoka nanyweye inzoga”. 

Kuwa mbere, inteko ishingamategeko y’u Rwanda yatangaje ko yakiriye kandi yemeye kwegura kwa Mbonimana Gamariel “ku mpamvu ze bwite”. 

Byari bikurikiye ijambo rya Perezida Paul Kagame muri weekend aho yanenze polisi y’u Rwanda kudafunga umudepite wafashwe na polisi mu muhanda “atwaye imodoka yasinze”. 

Perezida Kagame utaravuze mu izina uwo mudepite, akavuga ngo “muzamumenya” yavuze ko iyo yari inshuro “ya gatanu cyangwa iya gatandatu” yari afashwe gutyo ariko “ntihagire icyo bamutwara kubera ubudahangarwa”. 

Inkuru yo kwegura kwa Mbonimana yavuzwe kuwa mbere, ibinyamakuru byo mu Rwanda bihuza izina rye n’uwo Perezida Kagame yavugaga muri weekend mu nama y’umuryango Unity Club. 

Mu butumwa yashyize kuri Twitter kuwa kabiri asaba imbabazi perezida n’abanyarwanda, Mbonimana yagize ati: “Nafashe umwanzuro wo kutazongera kunywa inzoga”. 

BBC yamubajije niba ubwo butumwa ari ubwe, asubiza yanditse ati: “Nubwanjye”. 

Mu Rwanda, gutwara ikinyabiziga wasinze bihanishwa amande ya 150,000 Frw ariko kuva mu myaka ya vuba hagiye hiyongeraho gufunga iminsi itanu uwafashwe yasinze atwaye.

Gamariel Mbonimana, yari umudepite w’ishyaka Parti Liberal kuva mu 2018.

Théogène Munyangeyo, visi perezida w’ishyaka PL yabwiye televiziyo y’u Rwanda ko “nta narimwe twari twarigeze tumubona anywa inzoga”, yongeraho ko nk’ishyaka ryabo ryatunguwe.

Abantu batandukanye basubije ubutumwa bwe bavuga ko bamubabariye, abandi bavuga ko uko abadepite batorwa bikwiye guhinduka.