Perezida Ruto ari kunengwa bikomeye, abanyamategeko basabye imyigaragambyo yo kumwamagana
Ahavuye isanamu, AFP
Perezida William Ruto wa Kenya arimo kunengwa bikomeye nyuma yo kuburira ko ashobora kudakurikiza ibyemezo by’abacamanza "basaritswe na ruswa"
Kuwa kabiri, Ruto yavuze ko bamwe mu bacamanza biyunze ku banyapolitiki batavuga rumwe n’ubutegetsi kandi "bagambiriye" gutambamira imishinga y’iterambere ya guverinoma ye.
Mu gisubizo cyihuze, umukuru w’ubucamanza bwa Kenya Martha Koome yavuze ko gusuzugura ibyemezo by’urukiko ari ukunyuranya n’icyizere n’ububasha rubanda baha inkiko.
Mu itangazo, Koome yagize ati: "Iyo umukozi wa leta akangishije ko atazubaha ibyemezo by’urukiko, ubutegetsi bugendera ku mategeko buba bugeramiwe, bigaha urwaho igitugu mu gihugu”.
Koome yasabye abacamanza gukomeza kubahiriza inshingano zabo nta bwoba no kubogama.
Ahavuye isanamu, Getty Images
Perezida William Ruto yavuze ko bitumvikana uburyo "abantu babiri cyangwa batatu" baregera urukiko bagatambamira imishinga y’iterambere "Inteko Ishingamategeko yemeje…n’abaturage batoye muri manifesto y’ishyaka ryatsinze".
Yongeyeho ati: "Hagomba kubaho ibiganiro", asobanura ko ashaka ko ibyo bihinduka.
Muri Kenya, bibaho kenshi ko umuntu umwe cyangwa itsinda rishobora kuregera urukiko rukaba ruhagaritse ishyirwa mu bikorwa ry’icyemezo cyangwa umushinga runaka wa leta.
Raila Odinga utavuga rumwe n’ubutegetsi, yavuze ko ibyo Ruto yavuze ari iterabwoba kandi bihabanye n’ubutegetsi bugendera ku mategeko, ndetse avuga ko biganisha ku butegetsi bw’igitugu.
Odinga yavuze ko mu kuvuga biriya ku bucamanza Perezida Ruto "yarenze umurongo".
Komisiyo y’ubucamanza bwa Kenya, ikuriwe na Martha Koome, nayo yasohoye itangazo ryayo ivuga ko "ihangayikishijwe" n’amagambo ya perezida.
Ihuriro Law Society of Kenya ryo ryasabye ko mu cyumweru gitaha mu gihugu hose hakorwa imyigaragambyo yo kwifatanya n’ubucamanza no kwamagana ibyatangajwe na Perezida Ruto.
Kuwa gatatu mu itangazo ryasohowe n’umuvugizi wa leta Hussein Mohammed yavuze ko leta yiyemeje kurwanya icyo yise "ukudahana kuri mu bucamanza".
Perezida Ruto wagiye ku butegetsi muri Nzeri(9) 2022, amaze igihe ku gitutu no kunengwa kuzamura imisoro no kuzana imisoro mishya mu gihe izamuka ry’ibiciro ritoroheye abaturage.
Imisoro ibiri mishya – umusoro ku nyubako leta iteganya n’umusoro ku bwisungane rusange mu kwivuza – yaregewe urukiko, umwanzuro w’inkiko urategerejwe.
