Abakinnyi batandatu bo kwitega muri CAN 2025

Inyandiko gusa
Ifoto ifite amashusho igaragaza Victor Osimhen, Rogers Mato, Mohamed Amoura na Azzedine Ounahi ndetse n'ibendera rya Maroc.

Ahavuye isanamu, BBC Sport

Igikombe cy'Afurika kigiye gukinwa ku nshuro ya 35 kikazabera muri Maroc kuva ku itariki ya 21 y'uku kwezi kw'Ukuboza (12), naho umukino wa nyuma ukazabera i Rabat mu murwa mukuru w'icyo gihugu ku itariki ya 18 Mutarama (1) mu mwaka utaha.

Igihugu cyakiriye kiri mu bihatanira kwegukana iki gikombe, bwa mbere kuva mu mwaka wa 1976, mu gihe Mohamed Salah bizaba ari amahirwe kuri we yo kugaragaza ejo hazaza he mu ikipe ya Liverpool, mu gihe intego ye ari ugufasha Misiri kwegukana iki gikombe iheruka mu mwaka wa 2010.

Mu mazina menshi y'abakinnyi bakomeye bazitabira iri rushanwa, BBC Sport Africa yabateguriye amwe mu mazina akomeye y'abakinnyi utagomba gukuraho ijisho.

Azzedine Ounahi (Umukinnyi wo hagati wa Maroc)

Azzedine Ounahi, mu ifoto imugaragaza yambaye umwambaro w'ikipe ya Girona ufite ibara ry'umweru, ufite n'ibara ry'umutuku, ahanze amaso umupira umuri imbere.

Ahavuye isanamu, Getty Images

Insiguro y'isanamu, Azzedine Ounahi ubu ari gukinira ikipe ya Girona yo muri Espanye nyuma yo kumara umwaka nk'intizanyo mu mwaka ushize mu ikipe ya Panathinaikos yo mu Bugereki

Mu gihe Achraf Hakimi, Kapiteni wa Maroc akaba anaherutse kwegukana igihembo cy'umukinnyi w'umunya-Afurika witwaye neza, akomeje kugorwa n'imvune, Maroc ishobora gushakishiriza ahandi ku mukinnyi "uyiheka" muri iri rushanwa.

Mu mikino yo gushaka itike, Brahim Diaz, umukinnyi wa Real Madrid, ni we watsinze ibitego byinshi (7), ariko Azzedine Ounahi, ukina mu kibuga hagati mu ikipe ya Girona, ni we benshi muri Maroc biteze ko azigaragaza.

Ounahi yazamukiye mu ishuri ryigisha umupira w'amaguru rizwi cyane ryitiriwe Umwami Mohammed wa VI, nyuma yo kugirira ibihe bibi mu ikipe ya Marseille, ikipe yagiyemo nyuma yo kwigaragaza mu gikombe cy'isi cyo mu 2022.

Gusa kuva yajya muri Girona yo muri Espanye, muri Kanama (8), uyu mukinnyi w'imyaka 25 yongeye kuzamura urwego rwe rw'imikinire.

Maroc iri mu itsinda A hamwe n'ibirwa bya Comoros, Mali na Zambia. Mu gihe abakinnyi bakomeye mu yindi myanya atari akabuze kuri Maroc – urugero, ifite nka Yassine Bonou, umunyezamu wa mbere ukomeye muri Afurika, na Youssef En-Nesyri, rutahizamu w'inararibonye – ikibazo cyo kwibaza ni: ese Ounahi ni we ushobora kwigaragaza mu mwanya wa Hakimi igihe uyu yaba adakinnye?

Skip Ibisomwa cane and continue reading
Ibisomwa cane

End of Ibisomwa cane

Mohamed Amoura (Rutahizamu w'Algeria)

Mohamed Amoura, agaragara kuva mu rukenyerero kuzamura, yambaye umwenda w’umweru w’ikipe y’igihugu ya Algérie ufitemo amabara y’icyatsi n’umubare umuranga wa 18 imbere, arambuye amaboko kandi aseka cyane yishimira igitego.

Ahavuye isanamu, Getty Images

Insiguro y'isanamu, Mohamed Amoura, rutahizamu wa Wolfsburg yo mu Budage, yatsindiye Algeria ibitego 10 mu mikino yo gushaka itike, ubwo iki gihugu cyo mu majyaruguru y'Afurika cyabonaga itike yo gukina imikino y'igikombe cy'isi cyo mu 2026

Uyu mukinnyi watsinze ibitego byinshi muri Afurika mu mikino yo gushaka itike y'igikombe cy'isi, umwaka wa 2025 wabaye mwiza kuri we.

Uyu rutahizamu wa Wolfsburg yo mu Budage amaze gutsindira igihugu cye ibitego 11 mu mikino umunani guhera muri Werurwe (3), harimo n'ibitego bitatu mu mukino umwe yatsinze Mozambique.

Ibyo bihe byiza amazemo iminsi, byamufashije kuba umukinnyi wa mbere wo kwitega mu ikipe ya Les Verts, ikipe y'igihugu y'Algeria (yambara imyenda irimo icyatsi kibisi).

Riyad Mahrez aracyari umukinnyi ukomeye w'ingenzi w'ikipe y'Algeria, iheruka no kwegukana igikombe mu mwaka wa 2019, ariko uyu mukinnyi amaze kubaka ubufatanye bukomeye mu kibuga hagati ye n'uwo mugenzi we bakinana.

Algeria iri mu itsinda E ihuriyemo na Sudani, Burkina Faso na Equatorial Guinea.

Victor Osimhen (Rutahizamu wa Nigeria)

Victor Osimhen, yambaye umwenda w’umweru w’ikipe y’igihugu ya Nigeria ufite imirongo y’icyatsi, ndetse n'igikoresho cy’umukara kimukingira mu maso, arambuye amaboko yombi afunze ibipfunsi mu buryo bwo kwishimira igitego, arasa n'uvuga arangurura ijwi ahagaze iruhande rw’izamu. Osimhen agaragara kuva mu rukenyerero kuzamura.

Ahavuye isanamu, Reuters

Insiguro y'isanamu, Victor Osimhen yafashije Nigeria kugera mu mikino ya nyuma yo gushaka itike y'igikombe cy'isi cyo mu 2026, gusa iki gihugu cyatsinzwe kuri penaliti ku mukino wa nyuma na Repubulika ya Demokarasi ya Congo
Skip podcast promotion and continue reading
WhatsApp channel ya BBC Gahuza

Amakuru ya BBC Gahuza ako kanya kuri WhatsApp yawe

Kanda hano ujyeho

End of podcast promotion

Ni uruca abana kuba twamuhisemo, ariko kugera kure kwa Nigeria kuzagenwa cyane no kuba uyu rutahizamu wa Galatasaray yo muri Turukiya azaboneka ndetse niba azaba ameze neza mu kibuga.

Ikipe y'igihugu ya Nigeria (yitwa Super Eagles) yabonye amanota ane gusa muri 15 yashobokaga, mu gihe uyu rutahizamu wayo w'imyaka 26 atari ahari, mu mikino yo gushaka itike y'igikombe cy'isi cyo mu 2026, urugendo rutabahiriye kuko batsinzwe na Repubulika ya Demokarasi ya Congo kuri penaliti ku mukino w'inyongera wo kugira ngo amakipe yisobanure, ubwo Osimhen yagiraga ikibazo cy'imvune agasimbuzwa igice cya mbere kirangiye.

Osimhen ni umukinnyi w'ingenzi ku ikipe ya Nigeria itozwa n'Umunya-Mali Eric Chelle.

Frank Onyeka, ukinana na Osimhen, amusobanura nk'umukinnyi uri "ku rundi rwego" ndetse anavuga ko imikinire ya Osimhen izaba ari ingenzi kugira ngo Nigeria ishobore kurusha aho yageze ubushize muri Côte d'Ivoire, aho yari yabaye iya kabiri.

Iki gihugu cyatwaye igikombe cy'Afurika inshuro eshatu, kizatangira gikina na Tanzania mu itsinda C, hanyuma gikurikizeho Uganda na Tunisia, yegukanye iki gikombe mu mwaka wa 2004.

Ibrahim Mbaye (Umukinnyi ukina ku ruhande wa Sénégal)

Ifoto ya Ibrahim Mbaye, imugaragaza kuva mu rukenyerero yambaye umwambaro w'ikipe y'igihugu ya Sénégal yanditseho nimero 27 mu gatuza, asa n'uhanze amaso umupira uri hasi mu gihe cy'umukino.

Ahavuye isanamu, Getty Images

Insiguro y'isanamu, Ibrahim Mbaye, w'imyaka 17, yatangiye gukinira Sénégal mu kwezi gushize mu mukino bakinnye na Brazil

Sadio Mané aracyari kizigenza wafashije igihugu cye cya Sénégal gutwara igikombe cy'Afurika cyo mu 2021, mu gihe Iliman Ndiaye na Ismaïla Sarr ari bamwe mu bakinnyi bari kwigaragaza muri shampiyona y'icyiciro cya mbere mu Bwongereza, bigatuma uko ari batatu bagize ubusatirizi bwo kwitondera.

Ariko abakurikirana iby'umupira bashobora kurabukwa muri Ibrahim Mbaye umukinnyi ukomeye wa Sénégal wo mu bihe biri imbere, ubwo iyi kipe izaba ikina mu itsinda D na Botswana, Repubulika ya Demokarasi ya Congo na Bénin.

Mbaye, wahoze akinira ikipe y'ingimbi y'Ubufaransa, ubu ari kwinjizwa buhoro buhoro mu ikipe y'abakuru ya Paris Saint-Germain muri uyu mwaka w'imikino, aho aherutse gutangira mu mukino wa Champions League batsinzemo Barcelona. Mbere, yasimbuye mu mukino batsinzemo Tottenham mu gikombe cya 'European Super Cup'.

Mbaye yakiniye Sénégal umukino we wa mbere bahura na Brazil mu kwezi gushize, nyuma mu minsi yakurikiyeho aba umukinnyi muto kurusha abandi watsindiye Sénégal igitego, ku myaka 17 n'iminsi 298, ubwo yatsindaga mu mukino banyagiyemo Kenya ibitego 8-0.

Rogers Mato (Umukinnyi w'imbere ku ruhande wa Uganda)

Rogers Mato, wambaye umwambaro w’umweru n’umukara w’ikipe ya Uganda ufite nimero zirindwi yandikishije ibara ry'umukara, na Rafik Belghali wambaye umwambaro w’icyatsi w'Algeria, bari guhatanira umupira utagaragara mu ifoto mu mukino w’umupira w’amaguru. Ibendera rigabanyijemo ibice bibiri mu buryo bugororotse, uruhande rumwe rufite ibara ry’icyatsi n’urundi rufite ibara ry’umweru, rimanitse inyuma ku rukuta.

Ahavuye isanamu, Getty Images

Insiguro y'isanamu, Rogers Mato (ibumoso) ni umwe mu bayoboye abamaze gutsinda ibitego byinshi muri shampiyona y'icyiciro cya mbere muri Macedonia uyu mwaka, aho amaze gutsinda ibitego 12

Imisambi (The Cranes) ya Uganda yasubiye mu mikino y'igikombe cy'Afurika cy'ibihugu yaherukagamo mu 2019, ubwo basezererwaga muri 1/8. Iki gihugu kiri no mu myiteguro y'ibihugu bizakira iyi mikino yo mu mwaka wa 2027.

Iyi kipe y'umutoza w'Umubiligi Paul Put yarangije ku mwanya wa kabiri mu itsinda ry'amajonjora yo gushaka itike y'igikombe cy'isi, inyuma y'Algeria. Rogers Mato ni umwe muri babiri (we na Allan Okello) batsinze ibitego byinshi, bombi banganya bitatu.

Uyu mukinnyi w'imyaka 22 ukina nka semababa w'ibumoso (left winger) yatsinze ibitego bibiri byiza cyane mu mukino batsinzemo Mozambique muri Nzeri (9), ubu akaba ari mu bakinnyi bari kwitwara neza mu ikipe akinamo ya Vardar ikina muri shampiyona ya Macedonia y'Amajyaruguru.

Uganda ifite akazi gakomeye mu itsinda C, aho izaba ihanganye n'abigeze gutwara iki gikombe, Nigeria na Tunisia, ndetse n'umukino w'abacyeba wa 'derby' yo muri Afurika y'uburasirazuba uzayihuza na Tanzania, bazanafatanya kwakira imikino y'igikombe cy'Afurika mu 2027.

Ikipe y'igihugu ya Uganda bizayisaba gukoresha amahirwe yose ibonye – kandi Mato ashobora kuba ingenzi cyane mu gutuma Uganda igera mu mikino ya 1/8 cy'irangiza.

Reinildo (Myugariro wa Mozambique)

Reinildo, wambaye umwambaro w'ikipe ya Sunderland ufite imirongo igororotse y’umutuku n’umweru, agaragara kuva mu rukenyerero kuzamura, ari kwiruka mu mukino w’umupira w’amaguru.

Ahavuye isanamu, Getty Images

Insiguro y'isanamu, Reinildo yabaye Umunya-Mozambique wa mbere ukinnye muri Premier League ubwo yatangiraga gukinira Sunderland ku itariki ya 16 Kanama (8)

Mozambique igiye mu majyaruguru y'Afurika, gusa mu nshuro eshanu iyi kipe imaze kwitabira iri rushanwa, ntirakandagiza ikirenge cyayo mu mikino ya 1/8 cy'irangiza.

Ariko ku nshuro ya mbere, Mozambique ubu ifite umukinnyi ukina muri Premier League. Reinildo yabaye Umunya-Mozambique wa mbere ukinnye muri iyo shampiyona y'icyiciro cya mbere mu Bwongereza ubwo yageraga muri Sunderland avuye muri Atletico Madrid muri Nyakanga (7).

Uyu myugariro w'ibumoso, w'imyaka 31, yafashije iyi kipe ya Sunderland yazamutse mu cyiciro cya mbere, gutangira neza umwaka w'imikino.

'Tico Tico', umukinnyi watsinze ibitego byinshi mu mateka ya Mambas, ikipe y'igihugu ya Mozambique, yavuze ko Reinildo ari we mukinnyi ngenderwaho w'iyi kipe.

'Tico' yabwiye BBC Sport Africa ati: "Ni umukinnyi w'intwari cyane [witanga cyane], ahuza buri wese kandi agaragaza umuhate bigafasha ikipe kugera ku musaruro mwiza."

Mu itsinda F, ririmo Côte d'Ivoire yegukanye igikombe cy'ubushize n'ikigugu Cameroun hamwe na Gabon, Reinildo na Mozambique ye bizabasaba kuba bameze neza cyane kugira ngo bashobore kwandika amateka.