Umugabo wo mu Buhinde 'wagurishije' kuri internet abayisilamukazi agiye kuburanishwa

Polisi yo mu Buhinde ivuga ko izaburanisha umugabo ushinjwa gukora 'app' yatangaje amafoto y'abayisilamu b'abagore barenga 80 kugira ngo "bagurishwe" ku rubuga rwa internet mu mwaka ushize.

Polisi yabitangaje nyuma yuko VK Saxena, umukuru w'umurwa mukuru Delhi, atanze uruhushya rwo kuburanisha mu rukiko Aumkareshwar Thakur, w'imyaka 25.

Iyo 'app' ishobora kugerwaho na buri wese – yitwa Sulli Deals – yari yashyizwe ku rubuga rwa internet rwitwa GitHub mu kwezi kwa karindwi mu 2021.

Thakur yari yatawe muri yombi mu kwezi kwa mbere uyu mwaka, ariko mu kwezi kwa gatatu arekurwa by'agateganyo hatanzwe ingwate.

Thakur, ufite impamyabumenyi ya kaminuza mu bumenyi bwa mudasobwa, yari yatawe muri yombi mu mujyi wa Indore wo muri leta ya Madhya Pradesh yo rwagati mu Buhinde, afashwe n'itsinda rya polisi y'i Delhi ryashyiriweho gukora iperereza ku byaha bikomeye.

Polisi yakiriye ibirego kuri we bishingiye ku ngingo zitandukanye z'amategeko ahana y'Ubuhinde, itegeko ry'Ubuhinde rigenga amakuru yo mu ikoranabuhanga n'ingingo ya 196 y'amategeko agenga imiburanishirize y'imanza mpanabyaha mu Buhinde.

Ingingo ya 196 ijyanye n'"ibyaha byakorewe leta", aho gukorerwa umuntu ku giti cye, ndetse muri rusange yisungwa ku bategetsi bo ku rwego rwo hejuru bo muri leta, ibi bigasaba uruhushya rwa guverinoma yo ku rwego rw'igihugu cyangwa urwa guverinoma yo ku rwego rwa leta (Ubuhinde bugizwe na za leta) kugira ngo ibone gukoreshwa.

'App' Sulli Deals yari yarafashe amafoto asanzwe aboneka ku mbuga za internet iyaha imyirondoro y'abayisilamu b'abagore, ivuga ko ari bo "bicuruzwa bigezweho uyu munsi".

Thakur yatawe muri yombi hamwe na Neeraj Bishnoi, w'imyaka 20, uyu akaba ashinjwa kuba ari we wari warakoze 'app' Bulli Bai yari yarapakiye (yarashyize) ku rubuga amafoto y'abayisilamu b'abagore barenga 100, kandi iyo 'app' na yo yari iri ku rubuga GitHub.

Kuri izo 'apps' zombi, nta bucuruzi nyirizina bwabayeho – icyari kigamijwe kwari ugutesha agaciro no gukoza isoni abayisilamu b'abagore.

Benshi muri bo ni ababaga baramaganye ugushyira imbere ubwoko bw'aba Hindu ku butegetsi bwa Minisitiri w'intebe w'Ubuhinde Narendra Modi (na we wo muri ubwo bwoko), ikirego ishyaka rye na leta akuriye bahakanye.

Abanenga ubutegetsi bwe bavuga ko kwibasira ku mbuga za internet abayisilamu b'abagore byahuhutse (byiyongereye cyane) mu myaka ya vuba aha ishize, muri politiki y'Ubuhinde isanzwe irangwamo ubuhezanguni mu kutavuga rumwe.

Raporo yo mu mwaka wa 2018 y'umuryango uharanira uburenganzira bwa muntu Amnesty International, ivuga ku itotezwa ryo ku mbuga za internet mu Buhinde, yagaragaje ko uko umugore arushaho kuzamura ijwi, ari na ko ibyago byuko atotezwa birushaho kwiyongera.

Iyo raporo yavuze ko ikigero cy'ibyo cyiyongereye ku bagore bava mu madini ya ba nyamucye no mu miryango y'amikoro macye.

Abagore batangajwe kuri izo 'apps' zombi bose bari abayisilamu bakundaga kuzamura ijwi cyane, barimo abanyamakuru, impirimbanyi, abahanzi n'abashakashatsi.

Umupilote utwara indege zikora ingendo z'ubucuruzi bwo gutwara abagenzi, ifoto ye yari yashyizwe kuri Sulli Deals, yari yabwiye BBC ko yumvise "asuherewe" ("akonje") mu ruti rw'umugongo ubwo yumvaga iby'iyo 'app'.

Ubwo mu kwezi kwa gatatu umucamanza yafunguraga by'agateganyo Thakur atanze ingwate, umucamanza yavuze ko uyu nta byago ateje byo guhunga igihugu agacika ubucamanza kandi ko atari mu mwanya watuma yivanga mu kazi k'iperereza.