Sudan: Mohamed Hamdan Dagalo ukuriye RSF yemeye ko ingabo ze zakoze 'ibara' muri El Fasher

Umukuru w'umutwe wa Rapid Support Forces muri Sudan yatangaje ko iperereza rigiye gutangira ku byaha n'ihohoterwa bivugwa ko byakozwe n'ingabo ze ubwo zari zifashe umujyi wa el-Fasher mu karere ka Darfur,

Jenerali Mohamed Hamdan Dagalo, uzwi ku izina rya Hemedti yavuze ibi nyuma yuko hasohotse raporo zivuga ko abasivile babarirwa mu bihumbi bishwe n'abarwanyi akuriye mu gufata uyu mujyi ku cyumweru.

Biteganyijwe ko Akanama gashinzwe umutekano muri UN gaterana uyu munsi kiga ku bibazo byo muri Sudan, igihugu kimaze imyaka itatu mu ntambara y'imbere mu gihugu ihuza ingabo za leta n'iza RSF.

Dagalo yameje ko hari ubwicanyi bwakozwe n'ingabo ze ndetse abitwa 'ibara'. Avuga ko hagiye gukorwa iperereza ku cyo imiryango mpuzamahanga yo yise 'ubwicanyi ndengakamere' bwakozwe n'abarwanyi ba RSF ku basivile muri el-Fasher.

Amashusho y'ubwo bwicanyi yakwirakwijwe ku mbuga nkoranyambaga n'abarwanyi ba RSF ubwabo, andi ni ayafashwe n'ibyogajuru akorwaho ubushakashatsi na kaminuza ya Yale yo muri Amerika yemeje ko muri el-Fasher harimo kuba ubwicanyi bukomeye ku basivile.

Jenerali Hamdan Dagalo yavuzeko yababajwe n'ubwo bwicanyi bwakorewe abaturage bo muri el-Fasher kandi yemera koko hari ihohoterwa ryakozwe n'ingabo ze, rikazakorwaho iperereza n'itsinda ryamaze kugera muri uwo mujyi.

Ishami ry'umuryango w'abibumbye ryita ku buzima OMS ryatangaje ko ryatunguwe kandi rishenguwe bikomeye n'amakuru ko abarwayi hafi 500 hamwe n'abari babarwaje biciwe mu bitaro rukumbi byari bisigaye bikora muri uwo mujyi.

Umutwe wa RSF wahakanye wivuye inyuma ibirego byo kwica abantu bashingiye ku bwoko, byumwihariko abadafite imico y'Abarabu. Ibishobora kuvamo ibyaha bya jenoside.

Abaharanira uburenganzira bwa muntu, bakomeje gusaba Emira Zunze Ubumwe z'Abarabu (UAE ) gusaba uwo mutwe guhagarika intambara.

UAE ishinjwa gushyigikira no guha ibikoresho by'intambara umutwe wa RSF, gusa irabihakana nubwo hari ibimenyetso byagaragajwe na raporo z'Umuryango w'Abibumbye.

ONU ivuga ko el-Fasher ari ho hantu habaye isibaniro rikomeye n'ikimenyetso cy'ububi bw'iyi ntambara ya Sudan.

Mu mezi 18 ashize mbere y'uko el-Fasher ifatwa ku cyumweru, abantu ibihumbi amagana batabashije guhunga bari baraheze muri uyu mujyi wari waragoswe na RSF ugahora uraswaho ibisasu. Nta biribwa cyangwa imiti byabashaga kubageraho.