Indege ya Vance wiyamamariza kungiriza Trump yaguye byihutirwa kubera ikibazo cy'urugi

Indege y'inkodeshanyo yari itwaye umukandida wo mu ishyaka ry'abarepubulikani JD Vance wiyamamariza kuba Visi Perezida wa Donald Trump, byabaye ngombwa ko igwa ku kibuga igitaraganya ku wa gatanu, kubera ikibazo cy'urugi rukora nabi.

Iyo ndege yo mu bwoko bwa Boeing 737 yari yahagurutse ku kibuga cy'indege cyo mu mujyi wa Milwaukee, muri leta ya Wisconsin, aho uwo senateri wo muri leta ya Ohio yari yitabiriye igikorwa cyo kwiyamamaza ari kumwe n'abapolisi, biba ngombwa ko asubira inyuma ngo iyo ndege ikorwe nyuma gato yuko ihagurutse.

Nyuma yo gukorwa, iyo ndege yakomeje urugendo yerekeza mu mujyi wa Cincinnati, muri leta ya Ohio, aho Vance atuye.

Mu cyumweru gishize, byabaye ngombwa ko Trump wahoze ari Perezida w'Amerika ahindura inzira y'indege ikagwa ku kibuga igitaraganya, ubwo yari arimo kujya muri mitingi (inama) muri leta ya Montana.

Muri urwo rugendo, Vance yari ari kumwe n'umugore we Usha, imbwa ye Atlas, abakozi be bashinzwe ibikorwa byo kumwamamaza, n'abanyamakuru, ubwo hatangazwaga ko iyo ndege igwa ku kibuga igitaraganya ku wa gatanu nyuma ya saa sita z'amanywa.

Taylor VanKirk, umugore uvugira Vance, yasohoye itangazo agira ati: "Umupilote yagiye inama ko hari ikibazo cyo gukora nabi kw'aho umuryango ufungirwa."

Uwo muvugizi yongeyeho ati: "Nyuma yo gutangaza kugwa by'igitaraganya, indege ya Trump Force Two yasubiye i Milwaukee. Icyo kibazo kikimara gucyemurwa, indege yasubiye mu nzira yayo ya mbere yari iteganyijwe yerekeza i Cincinnati."

Ikinyamakuru the New York Times cyatangaje ko ubwo hari hashize iminota hafi ine iyo ndege ihagurutse, umupilote yatanze ubutumwa asaba abagenzi gukomeza (kuzirika neza) imikandara y'intebe zabo.

Icyo kinyamakuru cyatangaje kiti: "Abashinzwe umutekano w'abategetsi bari bari mu ndege bagize urujijo baranaseka, ndetse ntibyahise bisobanuka ku bagenzi bamwe ko habayeho ko indege igwa igitaraganya, kugeza ubwo indege yari yamaze kugwa ku kibuga."

Amakuru avuga ko umupilote yasubiye ku ndangururamajwi yo mu ndege nyuma yuko yari yamaze kugwa ku kibuga, asaba imbabazi abagenzi ku bw'"imitima yari irimo kudiha".

Muri uku kwezi, indege ya Vance n'iya Kamala Harris wiyamamariza kuba Perezida wo mu ishyaka ry'abademokarate (usanzwe ari Visi Perezida w'Amerika), zisanze ziparitse zegeranye muri leta ya Wisconsin.

Mu buryo bwo "gutebyamo gacye", Vance yaratambutse amaterekampfizi (gacye gacye), yegera iyo ndege ikoreshwa na buri Visi Perezida w'Amerika, nuko abwira abanyamakuru ati: "Nashakaga gusa kugenzura [kureba] indege yanjye yo mu gihe kiri imbere."

Muri Gicurasi (5) uyu mwaka, indege ya Trump yagonze indege nto bwite y'ikigo yari iparitse, ubwo iyo ya Trump yari irimo kugenda gahoro mu nzira yo ku kibuga cy'indege cyo muri leta ya Florida.

Nta bantu batangajwe ko bakomeretse, ndetse ntibyasobanutse niba Trump yari ari muri iyo ndege. Mu masaha yari yabanje, yari yagaragaye ari muri mitingi muri leta ya New Jersey.