Macky Sall yitezwe muri Ukraine na Russia: Uru ruzinduko rugamije iki kandi ruvuze iki?
Ahavuye isanamu, Getty Images
Mu cyumweru gishize, Perezida Macky Sall wa Senegal yatangaje ko azajya mu Burusiya na Ukraine mu biganiro by'amahoro mu izina ry'umuryango w'Ubumwe bwa Africa akuriye.
Ubwo yari mu kiganiro n'abanyamakuru hamwe na Chancelier w'Ubudage, Olaf Scholz, Sall yatangaje ko Africa ishaka amahoro kandi ko nta ruhande iriho hagati ya Ukraine n'Uburusiya.
Nubwo igihe azagira muri ibyo bihugu kitaratangazwa n'abategetsi, ibinyamkauru muri Senegal biravuga ko Macky Sall azajya mu Burusiya muri iki cyumweru.
Ubumwe bwa Africa bwifuza iki ?
Muri icyo kiganiro, Macky Sall yagize ati: "Icya mbere, ntabwo ari intambara yo muri aka karere. Ni ku wundi mugabane n'ubwo bitugiraho ingaruka.
"Ariko kuri Africa, turashaka amahoro, ntabwo dushaka kugira uruhande dufata muri iki kibazo.
"Nubwo twamagana gutera ikindi guhugu, turakora ku buryo habaho ibiganiro kuko uko byagenda kose bizarangira ari uko habaye kwicarana ku meza".
Henshi muri Africa ibiciro by'ibicuruzwa byarazamutse kubera ingaruka z'ihungabana ry'uruhererekane mu bucuruzi n'ibicuruzwa ku isi n'izamuka ry'igiciro cy'ibitoro, bivuye kuri iyi ntambara.
Perezida Sall yabwiye Chancelier w'Ubudage impungenge Africa itewe n'ingaruka z'iyi ntambara, cyane cyane izamuka ry'ibiciro by'ibicuruzwa.
Africa ifite irihe jambo kuri aya makimbirane?
Ahavuye isanamu, Getty Images
Macky Sall avuga ko Ubumwe bwa Africa buri mu bikorwa byo kwiga inzira n'uburyo bwo guhangana n'ingaruka z'iyi ntambara.
Kugira ngo ibyo bishoboke, avuga ko bizashingira ku gukorana n'abafatanyabikorwa batandukanye kuri izi ngaruka.
Ariko umusesenguzi wa politike Ibrahima Bakhoum avuga ko ijambo rya Africa "ari hafi ya ntaryo".
Gusa ati: "Ariko nanone ntawavuga ko nta nyungu Africa yakura mu kujya mu gushaka umuti" w'iyi ntambara.
Bakhoum abona ko kuba ibihugu byinshi bya Africa byarerekanye ko nta ruhande bibogamiyeho bishobora gufasha Macky Sall uzajya kuvuga mu izina rya Africa.
Ati: "Ibyiza hano ni uko Africa izaba ifite ijwi rimwe ryo kutijandika mu kibazo. Icyo gihe, wavuga ko ishobora kuba umufatanyabikorwa wa biriya bihugu byombi."
Ukraine yiteze iki kuri Africa?
Ahavuye isanamu, Getty Images
Ukraine yakomeje gushyira imbaraga mu gusaba isi ko ijya ku ruhande rwayo muri iyi ntambara yatangiye muri Gashyantare (2) Uburusiya buyitera.
Mu nama rusange ya ONU tariki 02 Werurwe(3), umwanzuro wamagana ibitero by'Uburusiya kuri Ukraine watowe ku bw'iganze n'ibihugu 141 byawemeje ku bihugu 193 binyamuryango.
Ibihugu 28 bya Africa, birimo u Rwanda, nibyo byatoye bishyigikira uwo mwanzuro wo kwamagana ibitero by'Uburusiya kuri Ukraine.
Mu gihe ibindi 17 bya Africa byatoye ko byifashe kuri uwo mwanzuro.
Ibyo birimo Africa y'Epfo, Sudan, Namibia, Angola, Uganda, Sudani y'Epfo, Zimbabwe, u Burundi, Guinea Equatorial, Centrafrique, Madagascar, Algeria, Tanzania, Mali, Mozambique, na Congo.
Mu mpera za Mata(4), perezida wa komisiyo y'Ubumwe bwa Africa Moussa Faki Mahamat yatangaje kuri Twitter ko Perezida Zelensky wa Ukraine yifuza kugeza ijambo ku muryango w'Ubumwe bwa Africa.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Perezida wa Ukraine kandi yatangaje ko yifuza kugirana umubano n'Ubumwe bwa Africa, ibiboneka ko yifuza gushyigikirwa n'uyu mugabane.
Uburusiya bwo bwiteze iki kuri Africa?
Kuri uyu musesenguzi wa politiki Ibrahima Bakhoum, Uburusiya burifuza kwagura ijambo n'ingufu zabwo muri Africa.
Uburusiya bwasinye amasezerano y'ubufatanye n'ibihugu bitandukanye bya Africa mu nzego zirimo igisirikare, umutungo kamere, n'ingufu za nikleyeri.
Ibyo bihugu birimo nka Mali, Centrafrique, u Rwanda na Uganda n'ibindi.
Ahavuye isanamu, Getty Images
Nyuma yo gutera Ukraine, Uburusiya bwegereye izi nshuti zabwo nshya ngo zibushyigikire, cyangwa se nibura ntizifate uruhande kuri iki kibazo mu nzego nka ONU.
Sall azakora iki mu ruzinduko muri Ukraine?
Sall yagize ati: "Ubumwe bwa Africa bwantumye kujya gusaba guhagarika imirwano, no gusaba ko Ukraine n'Uburusiya byakongera kohereza mu mahanga ibinyampeke n'ibindi bicuruzwa isi ikeneye"
Macky Sall kandi yasabye ko "ibihano bimwe byafatiwe Uburusiya bikurwaho".
Ati: "Ibyo bizadufasha gucuruzanya nabwo no kugura amafumbire nkenerwa ku buhinzi bwacu."
Ousmane Bâ, ushinzwe itumanaho mu biro bya perezida wa Senegal yabwiye BBC ko Macky Sall azabonana na Vladimir Putin ndetse na Volodymyr Zelensky.
Ibinyamakuru muri Senegal bivuga ko Sall azajya mu Burusiya tariki 03 z'uku kwezi kwa Kamena (6). Gusa ibiro bye ntabwo biratangaza itariki y'urwo ruzinduko.
