Ukraine: Kuri TV y'igihugu Koloneli wa Russia uri mu kiruhuko cy'izabukuru yavuze atarya indimi

Inyandiko gusa
Mikhail Khodarenok
Insiguro y'isanamu, Mikhail Khodarenok yavuze ko Uburusiya buri mu kato kuzuye mu rwego rwa politiki
    • Umwanditsi, Steve Rosenberg
    • Igikorwa, Umwanditsi mukuru wa BBC ku Burusiya

Ibitangazamakuru bikomeye byo mu Burusiya bitanga ishusho y'intambara yo muri Ukraine itandukanye n'ikintu icyo ari cyo cyose ubona uri hanze y'Uburusiya. Icya mbere, ntibiyita intambara.

Ariko aha umwanditsi mukuru wacu ku Burusiya arasuzuma ikiganiro cy'imbonekarimwe cyanyuze kuri televiziyo y'igihugu mu Burusiya.

Cyari ikiganiro cyo kuri televiziyo kidasanzwe.

Ni ikiganiro cyitwa Iminota 60, gikurikirwa cyane, gicaho inshuro ebyiri ku munsi kuri televiziyo y'Uburusiya.

Ni ikiganiro cyo muri studio cyamamaza uko ibiro bya Perezida w'Uburusiya - Kremlin - bibona buri kintu icyo ari cyo cyose, harimo no ku cyo Perezida Vladimir Putin yise "igikorwa cya gisirikare cyihariye" muri Ukraine.

Kremlin iracyashimangira ko igitero cy'Uburusiya kirimo kugenda nkuko cyari cyateganyijwe.

Ariko ku wa mbere nijoro, umutumirwa muri studio Mikhail Khodarenok, umusesenguzi mu bya gisirikare akaba ari na koloneli uri mu kiruhuko cy'izabukuru, yatanze ishusho itandukanye cyane.

Yaburiye ko "uko ibintu bimeze [ku Burusiya] biraboneka ko bizaba bibi kurushaho" mu gihe Ukraine ibona imfashanyo ya gisirikare y'inyongera y'ibihugu byo mu burengerazuba (Uburayi n'Amerika) hamwe no kuba "igisirikare cya Ukraine gishobora guha imbunda abantu miliyoni".

Skip Ibisomwa cane and continue reading
Ibisomwa cane

End of Ibisomwa cane

Akomoza ku basirikare ba Ukraine, yagize ati: "Ubushake bwo kurwana kuri kavukire yabo burahari cyane. Intsinzi ku rugamba igenwa n'umuhate [umurava] uri hejuru w'abasirikare barimo kumena amaraso ku bw'ibitekerezo biteguye kurwanirira".

Yongeyeho ati: "Ikibazo gikomeye ku kuntu ibintu bimeze mu gisirikare na politiki [y'Uburusiya] ni uko turi mu kato kuzuye ka politiki kandi isi yose irimo kuturwanya, nubwo tutarimo gushaka kwemera ko ari uko bimeze. Ducyeneye gucyemura uku kuntu ibintu bimeze.

"Uko ibintu bimeze ntibishobora gufatwa nkaho ari ibisanzwe mu gihe duhanganye n'urugaga rw'ibihugu 42 kandi ubushobozi, bwa gisirikare na politiki n'ubwa gisirikare na tekinike, bukaba ari bucyeya".

Tambuka X ubutumwa
Uremeye ibiri kuri X?

Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.

Uragaba: Ibitangwa n'izindi mbuga bishobora kubamwo gutangaza

Impera ya X ubutumwa

BBC ntibazwa ibivuye ku zindi mbuga.

Abandi batumirwa muri studio bari bacecetse. Ndetse n'uwari uyoboye ikiganiro, Olga Skabeyeva, ubusanzwe uba avuga ashimitse mu kuvuganira Kremlin, na we byari bidasanzwe ukuntu yasaga nk'uwumiwe.

Ahanini, kuri Khodarenok, byari nka kwa kundi bavuga ngo "Narabikubwiye [ko ari ko bizagenda]".

Mu kwezi kwa kabiri, yatangaje inyandiko mu kinyamakuru cyigenga gisesengura ibya gisirikare cyo mu Burusiya, mbere yuko Uburusiya butera Ukraine ku itariki ya 24 y'uko kwezi.

Icyo gihe, uyu musesenguzi mu bya gisirikare yari yanenze "uduca [ubwoko bw'ibisiga] dufite amashyushyu n'ibibiribiri bishyuhaguza" byavugaga ko Uburusiya buzagera ku ntsinzi mu buryo bworoshye mu ntambara muri Ukraine.

Umwanzuro we icyo gihe wari: "Intambara na Ukraine ntabwo iri mu nyungu z'igihugu z'Uburusiya".

Ikimenyetso cya Z ku mupira wo kwambara

Ahavuye isanamu, EPA

Insiguro y'isanamu, Ikimenyetso cya "Z" cy'"igikorwa cya gisirikare cyihariye" cy'Uburusiya muri Ukraine, kigaragara henshi mu murwa mukuru Moscow

Kunenga mu bitangazamakuru byandika ni ikintu kimwe. Ariko kuri televiziyo - irebwa n'abantu babarirwa muri za miliyoni - urwo ni urundi rwego.

Kremlin yashishikariye birenze kugenzura urubuga rw'amakuru hano: ifunga imbuga z'amakuru zigenga zo mu Burusiya ndetse ituma televiziyo - igikoresho cy'ingenzi mu guha iforoma (kugena) ibitekerezo bya rubanda - ikurikiza umurongo w'ubutumwa bwa Kremlin.

Ni ikintu cy'imbonekarimwe kumva isesengura nk'iryo rishingiye ku kuri rinyura kuri televiziyo y'igihugu y'Uburusiya.

Ni imbonekarimwe. Ariko si rukumbi. Mu byumweru bya vuba aha bishize, ibitekerezo binenga byagaragaye kuri televiziyo hano.

Mu kwezi kwa gatatu, mu kindi kiganiro gikurikirwa cyane cyo kuri televiziyo, ukora filime yabwiye uyoboye ikiganiro ati:

"Intambara muri Ukraine itanga ishusho iteye ubwoba, ifite ingaruka ikandamiza [mbi] cyane kuri sosiyete yacu".

None, ni iki cyabaye mu kiganiro Iminota 60? Iki cyaba cyari igitekerezo kije ako kanya, kitateguwe cyo gukangura Abarusiya bakemera ko Ukraine yabaciye mu myanya y'intoki?

Cyangwa cyari igikorwa cyateguwe cyo gutangaza ukuri mu rwego rwo gutegura abaturage b'Uburusiya ku makuru mabi ajyanye n'uko "igikorwa cya gisirikare cyihariye" kirimo kugenda?

Biragoye kubimenya. Ariko nkuko bivugwa mu mvugo yo kuri televiziyo, mukomeze kureba televiziyo y'Uburusiya ku bindi bimenyetso.