Umunyamabanga mukuru wa NATO avuga ko Ukraine ishobora gutsinda intambara

Umunyamabanga mukuru w'umuryango w'ubwirinzi bw'Uburayi n'Amerika (OTAN/NATO) avuga ko intambara y'Uburusiya kuri Ukraine itarimo kugenda nkuko yari yateganyijwe kandi ko kugerageza gufata akarere ka Donbas ko mu burasirazuba "byahamye hamwe".

Jens Stoltenberg yanavuze ko Ukraine ishobora gutsinda iyi ntambara.

Minisiteri y'ingabo z'Ubwongereza igereranya ko Uburusiya bwatakaje hafi kimwe cya gatatu cy'abasirikare babwo barwanira ku butaka kuva iyi ntambara yatangira mu kwezi kwa kabiri.

Igitero cy'Uburusiya cyazahajwe no kwirwanaho gukomeye kwa Ukraine hamwe n'ibibazo byo mu rwego rw'imikorere n'ibikoresho.

Mu ntangiriro, intego y'igitero cy'Uburusiya yasaga nko gukwirakwira mu gihugu bugahirika leta ya Ukraine.

Ariko Uburusiya bwaje gukura abasirikare mu turere bari barimo two mu nkengero y'umurwa mukuru Kyiv nyuma yo kunanirwa kuwufata.

Kuva hagati mu kwezi kwa kane, mu bikorwa byabwo burimo kwibanda ku ntara ebyiri zo mu burasirazuba.

Muri Kharkiv, umujyi wa kabiri munini wa Ukraine, abategetsi bavuga ko abasirikare b'Uburusiya basubiye inyuma berekeza ku mupaka kandi ko abari bawutuyemo barimo kugaruka kuwubamo.

Umukuru wa OTAN Stoltenberg yagize ati: "Intambara y'Uburusiya muri Ukraine ntirimo kugenda nkuko Moscow yabiteganyaga".

"Bananiwe gufata Kyiv, barimo kuva mu nkengero za Kharkiv, igitero cyabo kinini muri Donbas cyahamye hamwe. Uburusiya ntiburimo kugera ku ntego z'umugambi wabwo".

Stoltenberg yabivugiye mu nama n'abaminisitiri b'ububanyi n'amahanga bo mu bihugu biri muri OTAN.

Hamwe no kunanirwa kugera ku ntego zabwo za gisirikare, indi ngaruka y'igitero ni uko Uburusiya bushobora kuzahura no kwaguka kwa OTAN, mu gihe byitezwe ko Sweden (Suède) na Finland byinjira muri uyu muryango.

Perezida w'Uburusiya Vladimir Putin abona OTAN nk'inkeke ku mutekano w'Uburusiya, ndetse ku ruhande rumwe igitero cy'Uburusiya kuri Ukraine cyari kigamije kuyibuza kwinjira muri OTAN.

Minisiteri y'ingabo z'Ubwongereza ivuga ko igitero cy'Uburusiya ku karere ka Donbas "cyatakaje umurego kandi gisigara inyuma bikomeye ku ngengabihe [yacyo]".

Iyi minisiteri yavuze ko Uburusiya burimo guhura n'imbogamizi y'"ishyaka [umurava] rikomeje kuba hasi n'umusaruro mu mirwano wagabanutse".

Minisitiri w'ububanyi n'amahanga w'Ubwongereza Liz Truss yavuze ko inshuti za Ukraine zigomba gukomeza ubufasha bwazo bwa gisirikare mu gufasha Ukraine "kwirukana Uburusiya".

Ku rugamba, abasirikare ba Ukraine barimo kwigaranzura abasirikare b'Uburusiya mu mujyi wa Izyum, nkuko byavuzwe na Guverineri Oleh Sinegubov w'ako karere - ikintu gishobora kubangamira gahunda y'Uburusiya yo gufata Donbas.

Ariko mu makuru mashya cyatangaje, igisirikare cya Ukraine na cyo cyemeye ko hari ibyo cyananiwe, kivuga ko Uburusiya burimo gutera intambwe mu bice byinshi byo muri ako karere.

Nta gahenge kabayeho ku barwanyi ba Ukraine basigaye mu mujyi wa Mariupol, aho Uburusiya bukomeje kumisha ibisasu ku ruganda rw'ibyuma bahezemo.

Videwo bivugwa ko igaragaza imbere muri urwo ruganda, yerekanye abagabo bareba kuri telefone zabo banakina umukino wa 'chess' (jeu d'échecs).

Mu burengerazuba bwa Ukraine, guverineri w'akarere ka Lviv yavuze ko ibisasu bya misile byibasiye ibikorwa-remezo bya gisirikare.