Rwanda: Sweden yohereje Jean Paul Micomyiza wari umunyeshuri i Butare ushinjwa jenoside
Ahavuye isanamu, RBA
Ubushinjacyaha bw'u Rwanda bwakiriye Jean Paul Micomyiza woherejwe na Suède kuburanishwa ku byaha bya jenoside ashinjwa ko yakoze ari umunyeshuri muri kaminuza y'u Rwanda i Butare mu 1994.
Jean Paul Micomyiza yafashwe mu Ugushyingo (11) 2020 ku nyandiko zo kumufata z'u Rwanda.
Yaburanye mu nkiko za Sweden arwanya koherezwa mu Rwanda, ubucamanza bwaho mu Ukuboza (12) 2021 bwanzura ko nta mpamvu yatuma atoherezwa mu Rwanda.
Abandi Banyarwanda batatu baregwa jenoside bafungiye muri Sweden aho bakiburana ku koherezwa mu Rwanda.
Micomyiza w'imyaka 50, aregwa n'ubushinjacyaha bw'u Rwanda kuba mu bateguraga ibikorwa byo kumenya no guhiga abasivile b'abatutsi bagomba kwicwa mu 1994, ubwo we yari afite imyaka 22.
Bumurega "ibyaha bya jenoside, ubufatanyacyaha mu gukora jenoside, n'ibyaha byibasiye inyoko muntu", nk'uko itangazo ry'ubushinjacyaha ribivuga.
Micomyiza ntabwo ariregura ku byaha aregwa.
Ibyo byaha aregwa kubikora ubwo yari umunyeshuri muri kaminuza y'u Rwanda i Butare ari naho avuka.
