Omicron muri Netherlands: Abagenzi 13 bavuye muri South Africa mu ndege babasanzemo ubu bwoko bushya

Ubwoko bushya bwa coronavirus yihinduranyije bwa Omicron babusanze mu bantu 13 bageze mu murwa mukuru w'Ubuholandi Amsterdam bari mu ndege ebyiri zivuye muri Afurika y'epfo.

Ni bamwe mu bagenzi 61 basanzemo coronavirus mu bari bari muri izo ndege.

Bibaye mu gihe ingamba zikaze kurushaho zashyizweho mu Buholandi, mu gihe habonetse ubwandu bwa mbere bwinshi muri iki gihugu kandi hakaba hari impungenge zitewe n'ubu bwoko bushya.

Muri izo ngamba harimo amasaha ya kare yo gufunga ibikorwa byo kwakira abashyitsi ndetse n'ahabera ibikorwa bijyanye n'umuco, no kugabanya abitabira guteranira mu ngo.

Omicron yamenyeshejwe bwa mbere ishami ry'umuryango w'abibumbye ryita ku buzima (OMS/WHO) ku wa gatatu w'iki cyumweru, ndetse ibimenyetso by'ibanze bica amarenga ko iteje ibyago biri hejuru cyane byo kongera kwandurwa.

OMS yavuze ko ubu bwoko "buhangayikishije".

Izo ndege za kompanyi y'Ubuholandi ya KLM zavuye i Johannesburg zigera i Amsterdam ku wa gatanu. Abagenzi bagera kuri 600 bamaze amasaha menshi batemerewe kuva ku kibuga nyuma yo kuhagera, mu gihe bari barimo gupimwa iyi virusi.

Abagenzi basanzemo Covid-19 bashyizwe mu kato muri hoteli iri hafi y'ikibuga cy'indege cya Schiphol i Amsterdam.

Abo basanze nta coronavirus bafite basabwe kwishyira mu kato mu rugo mu gihe cy'iminsi itanu nyuma bakongera bakipimisha.

Ni mu gihe abategetsi bavuze ko abari bahahagaze by'igihe gito bategereje izindi ndege bemerewe gukomeza ingendo, nubwo ku wa gatandatu hari amakuru yavugaga ko hari bamwe batari babonye inyandiko igaragaza ko nta Covid bafite, bituma badashobora kujya mu ndege ngo bakomeze ingendo.

Nyuma yo gutangaza kuri iki cyumweru abo bantu 13 basanzemo Omicron, Minisitiri w'ubuzima w'Ubuholandi Hugo de Jonge yaburiye ko hashobora kugira abandi bantu mu gihugu basangamo ubwo bwoko bushya bwihinduranyije.

Yatanze "ubusabe bwihutirwa" ku bantu barimo kugaruka mu gihugu bavuye muri Afurika y'amajyepfo kwipimisha Covid "vuba cyane bishoboka".

Ibihugu byinshi by'i Burayi, birimo nk'Ubwongereza, Ubudage n'Ubutaliyani, na byo hari abantu byasanzemo ubu bwoko bushya, hamwe no muri Botswana, Israel, Australia na Hong Kong.

Ubu ibihugu bimwe ku isi byamaze guhagarika cyangwa kugabanya ingendo zijya cyangwa zivuye muri Afurika y'epfo no mu bihugu byinshi bituranye na yo, nk'ingamba yo guhangana n'ubu bwoko bushya.

Afurika y'epfo yavuze ko uko guhagarika cyangwa kugabanya ingendo ari ukuyihana - aho kuyishimira - ko yatahuye ubwo bwoko bushya bwa Covid-19 yihinduranyije.

Ingamba nshya

Hagati aho, Ubuholandi ni kimwe mu bihugu byinshi by'i Burayi bisanzwe birimo kugorwa no guhagarika ubwandu bwa mbere bwinshi bwa Covid.

Iki gihugu gifite ibitanda bicyeya by'indembe, ibikorwa bimwe birimo kuburizwamo ndetse abantu babarirwa mu magana barimo kwicwa na Covid buri cyumweru, nkuko bivugwa n'umunyamakuru wa BBC Anna Holligan uri i The Hague (La Haye).

Ingamba nshya zatangiye gushyirwa mu bikorwa mu gitondo cyo kuri iki cyumweru kandi zizagumaho mu gihe kitari munsi y'ibyumweru bitatu biri imbere.

Ayo mategeko yashyizeho amasaha yo gufunga amaduka n'ahateranira abantu, ndetse agabanya umubare w'abashyitsi bemewe kugera mu ngo z'abantu.

Abantu barimo no gushishikarizwa gukorera imuhira aho bishoboka, ariko amashuri y'incuke, andi mashuri na za kaminuza mu gihugu bizakomeza gufungura imiryango.

Abantu babarirwa mu bihumbi bigaragambije ubwo izo ngamba nshya zatangazwaga.