Sierra Leone: Iminsi itatu y'icyunamo nyuma y'ikamyo y'ibitoro yaturitse ikica abarenga 100

Perezida wa Sierra Leone Julius Maada Bio yatangaje icyunamo (ikigandaro mu Kirundi) cy'iminsi itatu mu gihugu, nyuma yuko ku wa gatanu ikamyo itwara ibitoro ituritse ikica abantu barenga 100.

Bwana Maada Bio yavuze ko iki gihugu kigomba gukura isomo ku byabaye, yongeraho ko abakomeretse bazavurirwa ubuntu.

Yavuze ko arimo gushyiraho itsinda ryo gukora iperereza kuri iryo turika, ndetse rigatanga n'inama ku buryo bwo kwirinda ko ibi byazongera kubaho.

Kuri uyu wa mbere kandi, amabendera arururutswa kugeza hagati mu kwibuka abo bapfuye.

Abantu 115 barapfuye naho abandi barenga 100 barakomereka, ubwo ikamyo itwara ibitoro yaturikaga nyuma yo kugongana n'indi modoka y'ikamyo mu murwa mukuru Freetown.

Mu bihe bya vuba aha bishize, Sierra Leone yagiye ihura n'ibindi byago.

Mu kwezi kwa gatatu, abantu barenga 80 bakomerekeye mu nkongi y'umuriro yibasiye kimwe mu bice bituwemo mu buryo bw'akajagari cy'i Freetown, ituma abarenga 5,000 mu bahatuye bata ingo zabo.

Mu 2017, abantu barenga 1,000 bishwe n'inkangu yatewe n'imvura nyinshi.