Rwanda: Abafunze b’ishyaka DALFA-Umurinzi, umugore, n'umunyamakuru, bagejejwe mu rukiko
- Umwanditsi, Jean Claude Mwambutsa
- Igikorwa, BBC Gahuzamiryango
Abantu icyenda barimo abarwanashyaka ba DALFA-Umurinzi, ishyaka rya Victoire Ingabire, bagejejwe imbere y'urukiko i Kigali nyuma y'ibyumweru bibiri bafunze, urubanza rwabo rwahise rusubikwa.
Aba barimo barindwi Victoire Ingabire avuga ko "dufatanyije gahunda yo gushinga ishyaka", "umudamu w'inshuti yanjye". Barimo n'umunyamakuru Theoneste Nsengimana w'ikinyamakuru Umubavu TV.
Kuwa kane mu gitondo bazanywe n'imodoka y'imfungwa binjizwa mu rukiko rw'ibanze rwa Kicukiro bambitswe amapingu, ariko ntibatindamo.
Izindi wasoma:
Urwego rw'ubugenzacyaha (RIB) rubafunga, rwavuze ko "bakurikiranweho ibyaha byo gutangaza amakuru y'ibihuha agamije guteza imvururu n'imidugararo muri rubanda".
Mu rukiko, mu gihe bari batarasomerwa ibyaha baregwa, umwunganizi wabo Me Gatera Gashabana yasabye ko urubanza rusubikwa kuko dossier y'ibyo baregwa yayibonye ejo, ku wa gatatu.
Gashabana yavuze kandi ko na bamwe mu baregwa ari bwo bakiyibona bityo batakwiregura kuri dossier batabanje gusoma.
Mme Victoire Ingabire ukuriye ishyaka Dalfa-Umurinzi ritaremerwa n'amategeko mu Rwanda, nawe wari ku rukiko uyu munsi, we yatangaje ko abafunzwe bose hamwe ari 10.
Mu cyumweru gishize, ku rubuga rwa Twitter yavuze ko abo bafashwe "bacyekwaho kuba bari guteza intugunda mu baturage k'umunsi wa Ingabire Day".
Uwo munsi wari uteganyijwe kwizihizwa tariki 14 z'ukwezi kwa 10. Ikinyamakuru Umubavu TV cyari cyatangaje ko ibikorwa byo kuwizihiza kibicishaho biri kuba.
Bamwe mu bafunzwe, barimo n'uwo munyamakuru, bafashwe tariki 13 z'ukwezi kwa 10.
Mu itangazo ry'uko bafunzwe, RIB yasabye "abaturarwanda bakoresha imbuga nkoranyambanga kwirinda kuba umuyoboro w'abashaka guhungabanya umutekano w'igihugu, abenshi bihishe mu mahanga…"
Abatavugarumwe n'ubutegetsi banenga ubutegetsi kuniga ubwisanzure mu gutanga ibitekerezo, no kutorohera abafite ibitekerezo binyuranyije n'iby'ishyaka riri ku butegetsi.
Ubutegetsi bw'u Rwanda bwo bugaragaza ko ibyo atari ukuri, raporo - Rwanda Governance Scorecard - y'ikigo cy'imiyoborere yasohotse muri uku kwezi yerekana ko igipimo cy'uburenganzira mu bya politiki n'ubwisanzure kuri rubanda biri kuri 83%.
Urubanza rw'aba bafunze rwashyizwe kuwa kabiri w'icyumweru gitaha.
