Paul Rusesabagina: Inteko ya EU yamaganye urubanza yaciriwe isaba ko ahita arekurwa
Ahavuye isanamu, EU Parliament Live Event
Inteko ishingamategeko y'Ubumwe bw'Uburayi (EU) kuwa kane yamaganye urubanza rwaciriwe Paul Rusesabagina n'uburyo yagejejwe mu Rwanda, isaba umuryango w'ibyo bihugu kongera umuhate wayo ngo arekurwe.
Rusesabagina yahamwe n'ibyaha by'iterabwoba aho urukiko rukuru mu Rwanda rwamukatiwe gufungwa imyaka 25.
Abategetsi b'u Rwanda kenshi bagiye banenga ibivugwa n'amahanga n'imiryango mpuzamahanga ku kibazo cya Rusesabagina, bavuga ko ubutabera bw'u Rwanda bwigenga.
Uru rubanza rwe rwarakurikiranywe ku isi kuko azwi kubera film ya Hotel Rwanda ishingiye ku nkuru itavugwaho rumwe ko yarokoye Abatutsi bahigwaga muri jenoside.
Mu mwanzuro, utari itegeko ryo gukurikiza, wemejwe n'abadepite 660 kuri babiri bawanze na 18 bifashe, inteko ishingamategeko y'Uburayi "yamaganye ishimitse" urubanza yaciriwe, ivuga ko ari "urugero rwo guhonyora uburenganzira bwa muntu mu Rwanda."
Ahavuye isanamu, Getty Images
Rusesabagina yahamwe n'ibyaha bishingiye ku bitero bitandukanye byiciwemo abantu icyenda n'abandi bagakomereka byakozwe n'inyeshyamba za FLN z'impuzamashyaka MRCD yari umukuru wungirije.
Yafashe umwanzuro wo kwivana mu rubanza mu mizi ubwo rwari rugitangira avuga ko "nta butabera yiteze mu rukiko" rwariho rumuburanisha.
Umudepite w'Ububiligi muri iyo nteko, Kathleen Van Brempt, yagize ati: "Paul Rusesabagina ni umuturage w'Uburayi kandi ni inshingano zacu kurengera uburenganzira bw'ibanze. Uburenganzira bwahonyowe n'abategetsi mu Rwanda."
Asubiza ku byavuzwe na Madamu Kathleen, Martin Ngoga wahoze ari umushinjacyaha mukuru w'u Rwanda yanditse kuri Twitter ko "…Bitari mu buryo kuba abagizweho ingaruka [n'ibitero bya FLN] badafite umwanya mu byo uvuga n'ibyo wemera."
Umwanzuro w'iyo nteko ishingamangereko ya EU usaba "kurekurwa nta yandi mananiza kwa Bwana Rusesabagina ku mpamvu z'ubumuntu".
Isaba kandi abahagarariye EU mu Rwanda hamwe na ambasade z'Ibihugu by'Uburayi "kugeza cyane ubu busabe" ku bategetsi mu Rwanda.
Iyi nteko yanasabye inama iyoboye EU kongera gusuzuma bishimitse imfashanyo iri shyirahamwe riha leta y'u Rwanda n'izindi nzego z'igihugu, kugirango ntihabe gushidikanya ku bijyane no gushyira mu bikorwa kubahiriza uburenganzira bwa zina muntu.
Kandi, hakarebwa niba iyo mfashanyo idakoreshwa mu bikorwa bibangamira ubwisanzure bwo gutanga ibitekerezo no kwishyira hamwe, ubwisanzure bwa politike, iyubahirizwa ry'ubutegetsi bugendera ku mategeko hamwe n'amashyirahamwe yigenga atarwanira ibyicaro bya politike.
Yolande Makolo, umuvugizi wa guverinoma y'u Rwanda yanditse kuri Twitter agaragaza ko hari ibyo iyo nteko ishingamategeko ya EU yirengagije ubwayo kandi biri mu mwanzuro wayo:
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Mu kiganiro na France24 mu kwezi kwa gatanu i Paris, Perezida Paul Kagame yanenze ko hari amahanga asaba urubanza rw'intabera kuri Rusesabagina.
Yagize ati: "Ni nkaho ikintu cy'intabera mu Rwanda cyangwa muri Africa kigomba kuba gihagarikiwe n'Uburayi, Amerika cyangwa ahandi, hoya."
Umuryango washinzwe na Rusesabagina wasohoye itangazo rivuga ko umwanzuro wa EU ari "ijambo rikomeye cyane ku kibazo cya Paul".
