Ethiopia – Tigray: Inyeshyamba zirashinja AU kubogamira kuri leta

Inyeshyamba zo mu karere kibasiwe n'imirwano ka Tigray mu majyaruguru ya Ethiopia zishinja umuryango w'Ubumwe bw'Afurika (AU/UA) kubogama, nyuma y'iminsi ushyizeho Olusegun Obasanjo wahoze ari Perezida wa Nigeria ngo abe umuhuza hagati yazo na leta ya Ethiopia.

Getachew Reda, umuvugizi w'umutwe wa Tigray People's Liberation Front (TPLF), yashinje AU kuba ku ruhande rwa leta ya Ethiopia no kwemera gacye gusa ko hari imirwano imaze amezi icumi.

Ku mbuga nkoranyambaga, yavuze ko TPLF itarwanya ishyirwaho ry'umuhuza, ariko avuga ko haba harimo ubutesi kwitega ko ubwo butumwa hari icyo buzageraho.

Leta ya Ethiopia yakomeje kuvuga ko idashaka kugirana ibiganiro n'umutwe wa TPLF, ivuga ko ari uw'iterabwoba, ariko TPLF yo ivuga ko ari yo leta y'akarere ka Tigray yemewe n'amategeko.

Imirwano yakajije umurego kuva mu kwezi kwa gatandatu ubwo inyeshyamba - zibumbiye mu mutwe wa Tigray Defence Forces (TDF) uhuriwemo na TPLF n'indi mitwe yitwaje intwaro yaho - zisubizaga igice kinini cya Tigray harimo n'umurwa mukuru wayo Mekelle.

Ishyaka rya TPLF ni ryo ryari ku butegetsi mu karere ka Tigray mbere yuko rihirikwa n'ingabo za leta ya Ethiopia mu kwezi kwa cumi na kumwe mu 2020.

Abakuru ba TPLF bashwanye na Minisitiri w'intebe wa Ethiopia Abiy Ahmed ku bijyanye n'amavugurura muri politiki, nubwo kuba TPLF yarafashe ibigo bya gisirikare by'ingabo za leta byo muri Tigray ari yo yabaye imbarutso y'igitero leta yayigabyeho.