Somalia: Akarere ka Puntland kahaye igihano cy'urupfu abarwanyi 21 ba al-Shabab

Akarere ka Puntland gafite ubwigenge bucagase (butuzuye) muri Somalia kashyize mu bikorwa igihano cy'urupfu ku bagabo 21 nyuma yuko urukiko rubahamije kuba mu mutwe wiyitirira idini ya Islam wa al-Shabab.

Bakatiwe n'urukiko rwa gisirikare mu gace ka Galkayo, bamishwaho amasasu n'itsinda ry'abasirikare.

Radio y'igihugu yavuze ko 18 muri abo bagabo bari barakoze ibikorwa by'ubwicanyi no gutera ibisasu mu myaka irenga 10 ishize.

Mu gihe icyo gihano cy'urupfu cyashyirwaga mu bikorwa, umutwe wa al-Shabab wagabye igitero ku mujyi mu kindi gice cya Somalia, amakuru avuga ko wishe abasirikare.

Mu bihe byashize, ibihano nk'icyo byagiye bitangwa n'inkiko mu bindi bice bya Somalia.

Ariko iki gihano kivugwa ko ari cyo cya mbere gihawe umubare munini w'abarwanyi ba al-Shabab muri Puntland.

Abategetsi bo muri Puntland bari barasezeranyije kugeza mu bucamanza uwo ari we wese wo mu mutwe wa al-Shabab cyangwa umuntu uwo ari we wese wafatwa awufasha mu kugaba ibitero.

Umunyamakuru wa BBC Will Ross avuga ko al-Shabab igiteje inkeke ikomeye ku ituze rya Somalia.

Al-Shabab igenzura ibice binini byo mu majyepfo no hagati muri Somalia, ndetse ubushakashatsi bwatangajwe mu kwezi kwa cumi mu 2020 n'ikigo Hiraal bugaragaza ko uyu mutwe winjiza amafaranga menshi kurusha leta ya Somalia.

Mu gihe icyo gihano cy'urupfu cyashyirwaga mu bikorwa ku cyumweru, abarwanyi ba al-Shabab bateye umujyi wa Wisil mu karere ka Mudug.

Hari amakuru amwe avuga ko abasirikare batari munsi ya 20 bishwe ubwo ikigo cya gisirikare cyagabwagaho igitero.