Somalia: Perezida Farmajo yasabye ko habaho amatora mu guhosha ubushyamirane

Perezida wa Somalia Mohamed Abdullahi Farmajo yisubiyeho ku cyemezo yari yafashe cyo kugerageza kongera manda ye ho imyaka ibiri.

Icyo cyemezo cyari cyateje imirwano mu murwa mukuru Mogadishu ishingiye ku moko atandukanye, hagati y'abasirikare bamushyigikiye n'abatamushyigikiye.

Mu ijambo yagejeje ku gihugu, yasabye ko habaho andi matora ndetse ashima ibikorwa bya minisitiri w'intebe, amasaha macye mbere yaho wari wamaganye gahunda ya Bwana Farmajo yo gushaka kugundira ubutegetsi.

Manda ye yari yarangiye mu kwezi kwa kabiri.

Bwana Farmajo yavuze ko ku wa gatandatu azaba ari mu nteko ishingamategeko, agasubizaho amasezerano yo ku itariki ya 17 y'ukwezi kwa cyenda mu 2020 ajyanye na gahunda y'ibikorwa by'amatora.

Ibyo bizakuraho inyongera y'imyaka ibiri kuri manda ye yari yemejwe n'abadepite ku itariki ya 12 y'uku kwezi kwa kane.

Ayo masezerano yo mu 2020 ajyanye n'igikorwa cy'uko abakuru b'amoko bahitamo ababahagarariye mu nteko itora (electoral college), aba na bo bagahitamo abadepite bo ku rwego rwa leta, aba bakaba na bo bahitamo perezida.

Bwana Farmajo yagize ati: "Ndifuza kongera kwemeza, nkuko nabikoze mu gihe cyashize, ko iteka twamye twiteguye gutuma amatora abaho muri Somalia, ikirenzeho akabera ku gihe kandi mu mahoro".

Perezida wa Somalia yanashishikarije inzego zishinzwe umutekano kubungabunga umutekano w'abaturage b'abasivile kandi zikirinda "ibikorwa ibyo ari byo byose bishobora guteza umutekano mucye" ku ituze ry'igihugu.

Abaturage b'abasivile bari bamaze igihe bahunga ibikorwa by'urugomo. Hari hashize igihe kandi hari ubwoba ko umutwe w'intagondwa ziyitirira idini ya Islam za al-Shabaab zishobora gufatirana icyo cyuho cy'umutekano.