Maroc yageze muri kimwe cya kane isezereye Canada iri mu bihugu byakiriye igikombe cy'isi
Ahavuye isanamu, Getty Images
Canada yabaye igihugu cya mbere mu byakiriye igikombe cy'isi cya 2026 gisezerewe muri iri rushanwa, nyuma yo kunyagirwa na Maroc ibitego 3-0 mu mukino wabereye i Houston muri leta ya Texas muri Amerika.
Abanya-Maroc, bari bananiwe kwigaragaza mu gice cya mbere, bashyize bafungura izamu, ku ishoti rikomeye Azzedine Ounahi yaboneje mu nguni yo hasi adahagaritse ku munota wa gatanu w'igice cya kabiri, ku mupira w'umuterekano yari ahawe na Achraf Hakimi atunguye ba myugariro ba Canada mu kuwutera awusubiza inyuma.
Uwo mukinnyi wo hagati w'ikipe ya Girona yo muri Espagne yaje gusubyamo icya kabiri habura iminota umunani ngo umukino urangire.
Nuko mu minota y'inyongera Soufiane Rahimi ashyiramo icy'agashinguracumu, ku ishoti yanyereje akarinyuza munsi y'umunyezamu Maxime Crepeau.
Byari ibintu bigoye kubyakira kuri Canada, nyamara yari yo yatangiye umukino neza ndetse yagakwiye kuba yatsinze mu gice cya mbere.
Umutoza wa Canada Jesse Marsch, avuga ku kuntu ikipe ye yari yatangiye umukino, yagize ati: "Hari hari ikipe imwe mu kibuga."
"Twari tumeze neza cyane kurusha iyi kipe ya karindwi ku isi uyu munsi."
Ariko Maroc ni yo ikomeje muri kimwe cya kane, mu gihe isigaje intsinzi imwe kugira ngo inganye n'igihe yandikaga amateka ikagera muri kimwe cya kabiri mu gikombe cy'isi cyo mu mwaka wa 2022.
