Israel – Gaza: Netanyahu avuga ko 'Hamas yasubijwe inyuma ho imyaka myinshi'

Minisitiri w'intebe wa Israel Benjamin Netanyahu avuga ko ibitero bya Israel kuri Gaza bimaze iminsi icyenda "byasubije Hamas inyuma ho imyaka myinshi".

Israel n'amatsinda y'intagondwa z'Abanye-Palestine zo muri Gaza bongeye kurasana nijoro kugeza mu masaha yo mu rukerera rwo kuri uyu wa gatatu.

Abakozi babiri b'abanyamahanga bakora mu murima urimo n'urwuri, ku wa kabiri bishwe na rokete zarashwe n'intagondwa z'Abanye-Palestine mu majyepfo ya Israel.

Israel yakomeje ibitero byayo by'indege kuri Gaza. Muri West Bank, Abanye-Palestine batari munsi ya batatu bishwe n'abapolisi ba Israel mu myigaragambyo yabereye hafi ya Ramallah.

Ibikorwa byo mu rwego rwa dipolomasi byo gusoza uru rugomo nta kintu kinini birageraho.

Ubufaransa bwatanze umushinga w'umwanzuro mu kanama k'umutekano k'umuryango w'abibumbye (ONU/UN), bufatanyije na Misiri na Jordan, busaba ko habaho agahenge.

Mbere yaho ku wa kabiri, by'igihe gito Israel yafunguye umupaka na Gaza ituma urukurikirane rw'imodoka zitanga imfashanyo zinjira. Ariko, wongeye gufungwa nyuma yuko urashweho ibisasu na za rokete n'Abanye-Palestine.

Netanyahu yavuze iki nyirizina?

Bwana Netanyahu yavuze ko Hamas, umutwe w'intagondwa w'Abanye-Palestine ugenzura Gaza, "washegeshwe mu buryo utari witeze" kandi ko ibitero "bizakomeza kugeza igihe bizafata ngo ituze rigaruke" ku baturage bose ba Israel.

Abantu batari munsi ya 215, barimo hafi abagore 100 n'abana, biciwe muri Gaza kugeza ubu, nkuko minisiteri y'ubuzima ya Gaza ibivuga.

Muri Israel, abantu 12, barimo abana babiri, barishwe, nkuko urwego rw'ubuvuzi rubivuga.

Ku wa kabiri, Israel yavuze ko intagondwa zitari munsi ya 150 ziri mu biciwe muri Gaza. Hamas ntabwo itanga umubare w'abarwanyi bayo bapfuye.

Mbere yuko iyi mirwano itangira, Israel yagereranyaga ko amashami abiri y'intagondwa zo muri Palestine afite ububiko bw'ibisasu burimo rokete hafi 12.000 muri Gaza.

Kugeza ku isaha ya saa kumi n'imwe z'umugoroba (17h) zo mu Rwanda no mu Burundi zo ku wa kabiri, intagondwa zari zimaze kurasa za rokete 3.300 kuri Israel, muri zo iziri hagati ya 450 na 500 ntizageze aho zari zatewe, ziteza impfu muri Gaza, nkuko umuvugizi w'igisirikare cya Israel yabivuze.

Ni iki cyabaye nijoro?

Ibyuma bitera urusaku rw'intabaza (sirens) byavugiye mu majyepfo no hagati muri Israel, kubera za rokete zarashwe zivuye muri Palestine.

Indege ya Israel yagabye ibitero bibarirwa muri za mirongo, byinshi muri byo ku mujyi wa Khan Younis.

Mu gitondo cyo kuri uyu wa gatatu, intagondwa ebyiri z'Abanye-Palestine ziciwe mu gitero cy'indege cya Israel cyari kigendereye icumbi riri mu nyubako iri rwagati mu mujyi wa Gaza, nkuko bivugwa n'umunyamakuru wa BBC Rushdi Abualouf.