Saido Berahino muri Charleroi bamusanzemo Covid-19
Ahavuye isanamu, Getty Images
Saido Berahino, kapiteni w'ikipe y'igihugu y'u Burundi, bamusanzemo Covid-19, nk'uko ikipe yatijwemo ya Charleroi yo mu Bubiligi yabitangaje.
Charleroi Sporting Club iri ku mwanya wa munani muri shampiyona y'icyiciro cya mbere, yatangaje ko mu bipimo byafashwe ku wa mbere, abakinnyi bayo batandatu n'abakozi batanu babasanzemo Covid.
Abo bakinnyi, barimo Saido Berahino, kapiteni w'Intamba z'u Burundi, witeguraga kujya mu Burundi ku mukino bafitanye na Centrafrique ku wa gatanu tariki 26/03/2021.
Umwaka ushize nibwo Saido - waciye mu makipe nka West Bromwich Albion na Stoke City zo mu Bwongereza, yatijwe n'ikipe ye ya Zulte Waregem muri Charleroi.
Berahino aheruka kubwira BBC ko Intamba zishaka kujya mu gikombe cya Africa cya 2022 kugira ngo zigaragaze ko ubwo ziherukayo ubushize "bitari ibyazigwiririye".
Charleroi Sporting Club ivuga ko abakinnyi n'abakozi bayo basanzemo Covid-19 ubu bashyizwe mu kato - ubusanzwe kamara ibyumweru bibiri.
Ibinyamakuru mu Burundi bivuga ko abashinzwe ikipe y'igihugu bemeje ko Saido Berahino atakije kwifatanya n'Intamba kwitegura no gukina na Centrafrique.
Mu gushaka umwanya muri CAN 2022 izabera muri Cameroun, undi mukino w'Intamba mu Rugamba uzayihuza na Maroc itariki 30 z'uku kwezi.
