CHAN2021: u Rwanda na Uganda byanganyije mu mukino wa mbere mu itsinda C

Amavubi n'Imsambi ya Uganda zaguye miswi zinganya ubusa ku busa mu mukino wa mbere mu itsinda C mu irushanwa rya CHAN riri kubera muri Cameroun.

Amavubi yakinnye umukino mwiza ndetse mu gice cya mbere yabonye uburyo bwo gutsinda bwinshi kurusha Imisambi ya Uganda.

Mu gice cya kabiri nta gusatirana gukomeye kwabayeho, amakipe yombi yarangije iki gice nta irebye mu izamu ry'iyindi.

Mu wundi mukino wabaye muri iri tsinda, Maroc yatsinze Togo igitego kimwe ku busa.

Mu mikino itaha muri iri tsinda, kuwa gatanu u Rwanda ruzahura na Maroc naho Uganda ikine na Togo.

Amakipe ya Uganda n'u Rwanda mu myaka ibarirwa kuri 20 ishize ni abakeba mu mupira w'amaguru, benshi ariko babona ko birenze ibya 22 bajya mu kibuga ahubwo bifata n'imibanire ya politiki y'ibihugu byabo.

Mu kwa gatandatu 2003, Perezida Paul Kagame yari uwa mbere mu mbaga y'abaje kwakira nk'intwari abakinnyi b'Amavubi bari batsindiye Imisambi i Kampala.

Icyo gihe, ubukeba bw'aya makipe yombi sibwo bwari bugitangira ahubwo bwari bumaze igihe gito butangiye gukomera.

Hari hashize imyaka micyeya ingabo z'u Rwanda n'iza Uganda zirwaniye inkundura i Kisangani muri DR Congo, inzobere muri politiki y'akarere zivuga ko ari imirwano yahinduye byinshi mu mibanire y'ibi bihugu.

Umutoza Johnathan McKinstry wa Uganda, yari ahatanye n'umutoza Vincent Mashami w'Amavubi bakoranye amwungirije mu 2015-2016, ubwo uyu mwongereza yari umutoza w'Amavubi.

Mu mupira, amakuru n'amateka byahaga amahirwe Uganda

Amakuru yerekana ko umubano wa politiki utaraba mwiza hagati y'u Rwanda na Uganda nyuma y'amakimbirane yagaragaye cyane kuva mu 2018.

Perezida Paul Kagame niwe gusa wo muri aka karere kugeza ubu utaratangaje, kumugaragaro, gushimira mugenzi we Yoweri Museveni ku ntsinzi mu matora yabaye mu cyumweru gishize.

Nubwo mu mwaka ushize habayeho ibikorwa bikomeye byo kunga abategetsi bombi bikozwe n'amahanga, haracyaboneka ibimenyetso ko umubano w'ibi bihugu ukirimo agatotsi.

Mu mupira w'amaguru ku isi henshi byagiye biboneka ko ubukeba bw'ibihugu bituranyi muri politiki butera guhangana gukomeye iyo aya makipe ahuye mu mukino nk'uyu.

Mbere y'uyu mukino, impuzamashyirahamwe CAF yerekana ko Imisambi ya Uganda n'Amavubi y'u Rwanda bimaze gukina imikino igera kuri 32 kuva mu 1986, imisambi yatsinze imikino 14, Amavubi 10, zinganya imikino 8.

Imikino itanu Uganda Cranes iheruka gukina n'ibihugu bitandukanye yatsinze ine(4) itsindwa umwe(1), Amavubi yo yatsinzwe itatu(3) inganya ibiri(2).

Mu irushanwa rya CHAN riba buri myaka ibiri kuva mu 2009, Amavubi kure yageze ni muri 1/4 aho yatsindiwe na DR Congo, mu 2016 ubwo ryari ryabereye mu Rwanda.

Naho Imisambi ntirarenga amatsinda nubwo imaze gusiba muri CHAN inshuro imwe muri esheshatu imaze kuba, mu gihe Amavubi amaze kuyijyamo inshuro enye.