Coronavirus - Rwanda: Nyuma y'amezi arindwi umupira w’amaguru ugiye gusubukurwa

Ibikorwa by'umupira bigengwa n'ishyirahamwe ry'umupira w'amaguru mu Rwanda bizasubukurwa mu kwezi kwa cumi uyu mwaka, nk'uko bivugwa n'iri shyirahamwe rizwi nka FERWAFA.

Kuva hagati mu kwezi kwa gatatu uyu mwaka umupira w'amaguru mu Rwanda warahagaritswe kubera icyorezo cya coronavirus.

FERWAFA yatangaje ko ku matariki y'agateganyo shampiyona y'ikiciro cya mbere, Rwanda Premier League, izatangira tariki 30 z'ukwezi kwa 10 uyu mwaka, irangire mu kwa gatanu 2021.

Iyi shampiyona y'amakipe 16, yahagaritswe mu kwa gatatu imaze gukinwa imikino 23, APR yari iya mbere n'amanota 57, Rayon Sports ari iya kabiri n'amanota 50, Police FC ari iya gatatu, Mukura ari iya kane.

FERWAFA ivuga ko imikino ya nyuma ya shampiyona y'ikiciro cya kabiri yo izabera i Kigali kuva tariki 02/10/2020, naho shampiyona y'abagore izasubukurwe kuva tariki 03/10/2020.

Iri shyirahamwe rivuga ko iyo mikino yose izajya ikinwa hagendewe ku mabwiriza ya leta yo kwirinda coronavirus. FERWAFA

Kugeza ubu minisiteri y'ubuzima mu Rwanda ivuga ko abantu 2,104 banduye coronavirus mu gihe abo yishe ari batanu.