Rwanda: Pierre-Damien Habumuremyi wari minisitiri w'intebe yahakanye ibyo aregwa

Pierre-Damien Habumuremyi wahoze ari Minisitiri w'intebe w'u Rwanda kuva mu 2011 kugeza mu 2014 uyu munsi yabwiye urukiko ko ahakana ibyaha aregwa.

Bwana Habumuremyi aregwa gutanga sheki zitazigamiye n'icyaha cy'ubuhemu, ibyaha akekwa ko yakoze mu 2019 ari umuyobozi wa Kaminuza yashinze ya Christian University of Rwanda.

Bwana Habumuremyi usanzwe akuriye urwego rushinzwe intwari z'igihugu mu Rwanda, yaburaniye ku rukiko rw'ibanze rwa Gasabo ku gufungwa no gufungurwa by'agateganyo.

Mu rukiko hagaragaye abunganira bamwe mu bareze Bwana Habumuremyi.

Abamwunganira basabye ko aburanira mu muhezo bavuga ko yaburana atisanzuye mu gihe hari abanyamakuru bamutunze ibikoresho byabo kandi asanzwe agira uburwayi bw'umutima.

Ubushinjacyaha bwo bwanenze ibi, buvuga ko atari we wa mbere waba aburaniye mu ruhame.

Urukiko rwavuze ko rugiye kwiherera rugafata umwanzuro ku bisabwa n'impande zombi.

Nyuma urukiko rwavuze ko ubusabe bw'uruhande rw'uregwa nta shingiro bufite, umucamanza ategeka ko iburanisha rikomeza mu ruhame, Habumuremyi yiregura ku kirego cyo "gutanga sheki zitazigamiye".

Ku cyumweru tariki 05 z'uku kwezi nibwo urwego rukurikirana ibyaha mu Rwanda rwatangaje ko rwafunze Bwana Habumuremyi.

Uruhande rwa Bwana Habumuremyi rwavuze ko abo afitiye amadeni asanzwe ari kubishyura kandi azakomeza akabishyura.

Rusaba ko yarekurwa agakurikiranwa adafunze kugira ngo abishobore, kandi abashe no kwivuza kuko afite uburwayi.

Ubushinjacyaha bwo bwavuze ko Habumuremyi yarezwe kuva mu kwezi kwa kane 2020, agahabwa igihe gihagije cyo kwishyura ntabikore, ruvuga ko arekuwe ubu atari bwo yabasha kwishyura.

Nyuma yo kumva impande zombi urukiko rwavuze ko ruzavuga umwanzuro ku gufungwa cyangwa gufungurwa by'agateganyo kuri Bwana Habumuremyi ku itariki 21 z'uku kwezi kwa karindwi.