Trump guhagarika abashaka kwimukira muri USA bivuze iki? Bireba ba nde?
Ahavuye isanamu, Reuters
Perezida Donald Trump wa leta zunze ubumwe za Amerika yatangaje ko azasinya itegeko rihagarika by'agateganyo kwimukira muri Amerika kubera icyorezo cya coronavirus.
Mu butumwa yatangaje muri iki gitondo (mu ijoro muri Amerika) yise iki cyorezo "igitero cy'umwanzi utaboneka" anavuga ko hakenewe "kurengera imirimo" y'Abanyamerika.
Nta makuru menshi yabitanzeho. Gusa abadashyigikiye ubutegetsi bwe bavuga ko ari kwitwaza iki cyorezo mu kurwanya ko abantu bakwimukira muri Amerika.
Iki gihugu ubu gifite abantu banduye Covid-19 bagera ku 782,159 abagera ku 41,816 imaze kubica.
Bwana Trump yatangaje ibi mu gihe ibiro bye White House binavuga ko iyi virus yatangiye gucogora, bityo bashobora gufungura igihugu ubuzima bugakomeza bisanzwe.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Leta ya Amerika yari iherutse kumvikana na Canada na Mexico kongera igihe cy'amabwiriza adasanzwe ku mipaka abuza abantu benshi kwambuka, bikageza hagati mu kwezi kwa gatanu.
Ingendo ziva mu Burayi no mu Bushinwa zijya muri Amerika nazo zarahagaritswe, nubwo abantu bafite Visa z'igihe gito z'akazi, kwiga na business bemererwa.
Iki cyemezo ni bande kizagiraho ingaruka?
Ntabwo ubu biramenyakana neza abazagirwaho ingaruka n'icyemezo cya Bwana Trump cyangwa se igihe kizagira mu ngiro, ibiro bye White House nabyo ntacyo biratangaza.
Ikinyamakuru NewYork Times gisubiramo amagambo y'abakurikirana iby'ab'injira n'abasohoka muri Amerika, bavuga ko itegeko rihagarika by'agateganyo gutanga "green cards" na visa z'akazi rishobora kuba ari ryo rizaza mbere.
Ubutegetsi bushobora guhagarika ibikorwa byose abanyamahanga basabamo (application) kuba no gukora muri Amerika mu gihe runaka.
Mu kwezi gushize, leta ya Amerika yahagaritse ibikorwa byose byo gutanga visa ku bimukira kubera iki cyorezo.
Umwaka ushize, abantu barenga gato miliyoni imwe bahawe uburenganzira bwo gutura muri Amerika.
Benshi muri bo ni abakomoka muri Mexico, Ubushinwa, Ubuhinde, Dominican Republic, Philippines na Cuba.
Gusa, hejuru ya kimwe cya kabiri cy'abo ni abari basanzwe baba muri Amerika babonye ibyangombwa bibemerera kuhaguma naho abagera ku 459,000 ni abaje bavuye mu mahanga.
Abo muri iki kiciro cya nyuma - abasaba uburenganzira bwo kuba muri Amerika bari hanze - nibo ahanini bashobora kugirwaho ingaruka n'icyemezo cya Trump.
Ku mpunzi, abagera ku 30,000 bakiriwe muri Amerika mu 2019, benshi muri bo bavuye muri DR Congo, Myanmar, Ukraine, Eritrea, Afghanistan na Syria.
Ahavuye isanamu, Getty Images
Impamvu zaba ziri inyuma y'iki cyemezo
Isesengura ry'umunyamakuru
Anthony Zurcher umunyamakuru wa BBC muri Amerika ya ruguru avuga ko ibyemezo Donald Trump atangaza ku mbuga nkoranyambaga bigeze aho muri iki gihe bikemangwa cyane.
Avuga ko iki cyemezo yatangaje ku binjira muri Amerika kizagaragaza ububasha n'ishingiro ibikorwa bye kuri Twitter bifite.
Ntabwo ari ibanga ko Bwana Trump na benshi mu bajyanama be, bakibona abimukira muri Amerika nk'umutwaro aho kuba inyungu kuri Amerika. N'ibyo yanditse kuri Twitter, ko ibi bigamije kurengera ubuzima "n'imirimo y'abaturage BAKOMEYE ba Amerika", birashimangira ibyo.
Birashoboka cyane ko iki kifuzo cye kizamaganwa n'abashyigikira ko abantu bimukira aho bashaka, bamwe mu bifuza inyungu z'ubucuruzi n'abasanzwe bahangana nawe muri politiki n'ibitekerezo.
Gusa ibi nta kibazo ku mugabo Trump ukunda intambara ya politiki no gusembura abo batavuga rumwe igihe cyose abonye akanya.
Mu myaka ine ishize, Bwana Trump yaharaniye ko hakazwa amategeko ku bashaka kwimukira muri Amerika, yifuza ko Abayisilamu babuzwa burundu cyangwa by'igihe gito kwinjira muri Amerika.
Mu gihe hateganyijwe amatora ku mwanya ariho mu mezi ari imbere, ubu azanye indi ngingo yo kumufasha.
