Ubufaransa - Turukiya: Macron ashinja Erdogan kwivanga mu ntambara yo muri Libya
Ahavuye isanamu, Getty Images
Perezida Emmanuel Macron w'Ubufaransa yashinje mugenzi we wa Turukiya Recep Tayyip Erdogan kurenga ku byo yari yasezeranyije byo kutivanga mu ntambara yo muri Libya.
Bwana Macron yavuze ko ubwato bw'intambara bwa Turukiya buherekejwe n'abacanshuro bo muri Syria bwabonywe bugera muri Libya.
Bwana Erdogan ntacyo arasubiza kuri ibyo birego.
Mu ntangiriro y'uku kwezi kwa mbere, abategetsi batandukanye bo ku isi basezeranyije ko batazivanga mu kibazo cya Libya ndetse banasezeranya gukurikiza icyemezo cya ONU cy'ikomanyirizwa ku ntwaro.
Turukiya ishyigikiye leta ishyikiwe n'umuryango w'abibumbye iri ku butegetsi muri Libya ifite icyicaro mu murwa mukuru Tripoli.
Ubufaransa bwo bufitanye umubano n'ubutegetsi mucyeba buyobowe n'inyeshyamba Jenerali Khalifa Haftar.
Kuva mu kwezi kwa kane mu mwaka wa 2019, leta ya Libya yemewe na ONU ihanganye n'ibitero yagabweho n'abarwanyi bashyigikiye Jenerali Haftar.
Ahavuye isanamu, AFP
Bwana Macron yavuze ko kuba ubwato bw'intambara bwa Turukiya buri muri Libya ari "ukurenga bigaragara" ku byo Perezida Erdogan yari yemeye mu nama y'i Berlin mu Budage ku itariki ya 19 y'uku kwezi y'abategetsi bo ku isi biga ku kibazo cya Libya.
Yavuze ko ibikorwa bya Turukiya "bibangamiye umutekano w'Abanyaburayi bose n'abatuye mu karere ka Sahel".
Akarere ka Sahel - kagizwe n'ubutaka hafi icya kabiri cyabwo bugwamo imvura nke mu majyepfo y'ubutayu bwa Sahara - kamaze hafi imyaka 10 ari isibaniro mu ntambara yo kurwanya imitwe yitwaje intwaro igendera ku mahame akazi y'idini ya kisilamu.
Hari ubwoba ko intwaro zivuye muri Libya zishobora kunyanyagira muri ako karere ka Sahel, aho abasirikare 4500 b'Ubufaransa n'ingabo zibungabunga amahoro zirenga 14000 z'umuryango w'abibumbye bafite ibirindiro.
