Burundi: Natacha na bagenzi be bari kwigisha 'coding' abana 13,000

Nk'uko umwana yigishwa gusoma no kubara, barifuza ko mu Burundi abana bato baniga 'programmation' cyangwa 'coding' kuko nayo ari ingirakamaro kuri ejo habo, cyane cyane bibanze ku bakobwa.

Natacha Nduwimana ni umuyobozi akaba n'uwatangije Burundi Innovation Hub (Bihub) imaze icyumweru mu bikorwa byo kwigisha 'coding' mu bana ku mashuri y'i Bujumbura, Gitega na Ngozi.

Imashini (computers) ntizihagije ku bo bigisha bose ariko intego yabo ni ukugera ku bana 13,000 cyane abakobwa kuko babonye ko bari inyuma.

Nduwimana ati: "Twabonye ko ari ikibazo mu 2017 twakoresheje amahugurwa y'abahugura abandi haza abagabo 100 n'abakobwa batatu gusa, tubona ko bakiri inyuma none turashaka kubateza imbere kurushaho".

Nduwimana avuga ko ubu bumenyi ari ingenzi cyane ati: "Ubu abahanga bavuga ko uko umwana amenya gusoma no kwandika akwiye no kumenya gu 'programma'".

Bafatanyije na Africa Code week iri kuba no mu bindi bihugu 37 muri Afurika, Bihub iri kwigisha 'coding' ku bana bo mu mashuri 30 i Bujumbura, 10 mu ntara ya Gitega, ane (4) mu ntara ya Ngozi.

Babigisha iki muri coding?

Natacha avuga ko kugira ngo umwana yumve ibyo yiga bisaba kumwigisha ibyo akunda, bityo babigisha bakoresheje uburyo bufasha abana.

Ati: "Dukoresha 'programme' yitwa 'scratch' ifasha abana gukora 'animations', imikino y'abana, imibare, kubara... nyuma y'isaha imwe umwana aba amaze kumenya kwikorera agakino ke akoresheje scratch".

Avuga ko ibi bifungura umwana mu mitekerereze mishya ku ikoranabuhanga (ubuhinga bwa none).

Ingorane

Bifuza kugera ku bana benshi bashoboka, ariko ubu bakorana cyane cyane n'amashuri yigenga kuko ariyo menshi afite ibyumba by'imashini kurusha amashuri ya leta nk'uko Nduwimana abivuga.

Kugira ngo ibyo bakora bizakomere, Natacha Nduwimana avuga ko babanje kwigisha abarimu 200 basanzwe bigisha ikoranabuhanga ku mashuri yabo, aba bakazakomeza kwigisha abana Bihub idahari.

Nduwimana avuga ko ibyo bakora biri guhindura imitekerereze y'abana.

Ati: "Urugero twagiye i Gitega ahantu hitwa i Makebuko kwigisha abana 'coding', ni mu cyaro, twabajije abana baho icyo bashaka kuba nibakura bamwe bavuga ko bashaka kuba abigisha, kuba abaministiri…Ibintu by'ikoranabuhanga ntibari babizi na gatoya.

"Ariko tumaze iminsi tubigisha harimo abahavuye bavuga bati 'nifuza kuba umu-computer programmer', urumva ko haba hari ikintu cyiyongereyeho ku bumenyi bwabo".

Nduwimana avuga ko ubu bamaze kugera ku bana barenga 10,000 kandi bakomeje ngo bagere ku ntego yabo.

Ati: "Nubwo atashobora gukomeza gukora 'coding' [hano ku ishuri], ariko nagera mu mashuri yisumbuye cyangwa kaminuza azaba afite no guhitamo kwiga 'informatique' kuko yayibonyeho".