Meghan Markle yareze mu rukiko ikinyamakuru Daily Mail kubera ibaruwa ye y'ibanga

Inyandiko gusa
Meghan Markle

Ahavuye isanamu, EPA

Insiguro y'isanamu, Umugabo wa Meghan Markle afite ubwoba ko ibye byazaba nk'ibya Princess Diana

Umugore w'igikomangomakazi cy'Ubwongereza yatangije igikorwa cyo kurega mu rukiko ikinyamakuru Daily Mail cyaho.

Meghan Markle avuga ko icyo kinyamakuru cyatangaje imwe mu mabaruwa ye y'ibanga mu buryo bunyuranyije n'amategeko.

Mu itangazo Harry, igikomangoma cy'Ubwongereza, yashyize ahagaragara, yavuze ko we n'umugore we Meghan byabaye ngombwa ko baregera urukiko kubera "icengezamatwara ricadogora" bavuga ko ryibasiye umuryango wabo.

Igikomangoma Harry yagize ati: "Napfushije mama wanjye none ubu ndikureba umugore wanjye na we yibasirwa n'aba banyembaraga".

Umuvugizi w'ikinyamakuru Daily Mail yavuze ko iki kinyamakuru gihagaze ku nkuru cyatangaje kandi ko kizayisobanura "gishimitse" muri urwo rubanza.

Urwego Schillings rw'abanyamategeko baburanira uyu muryango, bashinje ikinyamakuru Daily Mail ibikorwa by'ipfobya bishingiye ku nkuru z'ibinyoma.

Uru rwego rwatanze ikirego mu rukiko rukuru rw'Ubwongereza rurega icyo kinyamakuru na kompanyi nyir'iki kinyamakuru.

Rugishinja ikoreshwa nabi ry'amakuru y'ubuzima bwite n'ikoreshwa nabi ry'umutungo bwite, nkuko biteganywa n'itegeko rigenga amakuru ryo mu 2018.

Skip Ibisomwa cane and continue reading
Ibisomwa cane

End of Ibisomwa cane

Ku rubuga rwa internet rw'uyu muryango w'ibwami, igikomangoma Harry yavuze ko "yakomerekejwe" n'ingaruka avuga ko zatewe no kwivanga mu buzima bwite bwabo kw'icyo kinyamakuru.

Mu rugendo basoje muri Afurika, beretse umwana wabo w'umuhungu Archie impirimbanyi y'uburenganzira bwa muntu yo muri Afurika y'Epfo, Archbishop Desmond Tutu

Ahavuye isanamu, EPA

Insiguro y'isanamu, Mu rugendo basoje muri Afurika, beretse umwana wabo w'umuhungu Archie impirimbanyi y'uburenganzira bwa muntu yo muri Afurika y'Epfo, Archbishop Desmond Tutu

Agendeye kuri nyina Diana wapfuye, wari igikomangomakazi cya Wales, Harry yavuze ko "ubwoba bwinshi cyane [afite] ari uko amateka yakwisubiramo".

Ati: "Nabonye uko bigenda iyo umuntu nkunda agizwe nk'igicuruzwa bikagera aho atagifatwa cyangwa ngo abonwe nk'umuntu".

Umunyamakuru wa BBC Nicholas Witchell ukurikiranira hafi inkuru z'ibwami avuga ko iryo tangazo rya Meghan na Harry "mu buryo butangaje ridaca ku ruhande".

Avuga ko kandi "ryibasiye ibinyamakuru bitizerwa bihagije [tabloid] byo mu Bwongereza", gusa kuba icyo kirego cyaba gifite ishingiro ari ibyo gutega amaso.

Si ubwa mbere abo mu muryango w'ubwami mu Bwongereza bareze itangazamakuru mu rukiko.

Mu 2017, batsindiye impozamarira y'amapawundi 92,000 kuko ikinyamakuru cyo mu Bufaransa cyatangaje amafoto agaragaza igice cyo hejuru kitambaye cy'umugore w'igikomangoma mu 2012.

Urukiko rwo mu Bufaransa rwanzuye ko ayo mafoto yarengereye mu kwinjira mu buzima bwite bw'uwo muryango.