Leta ya Kongo ivuga ko iri gushakisha abarwayi bane ba Ebola baburiwe irengero nyuma y'igitero cy'i Butembo

Inyandiko gusa
Abaganga batwaye umurwayi wari umaze kwemezwa ko atarwaye Ebola, ku kigo kivurirwamo Ebola i Butembo mu kwezi kwa cumi na kumwe mu mwaka ushize wa 2018

Ahavuye isanamu, AFP/Getty Images

Insiguro y'isanamu, Abaganga batwaye umurwayi wari umaze kwemezwa ko atarwaye Ebola, ku kigo kivurirwamo Ebola i Butembo mu kwezi kwa cumi na kumwe mu mwaka ushize wa 2018

Minisiteri y'ubuzima muri Repubulika ya Demokarasi ya Kongo ivuga ko umupolisi umwe yishwe naho abarwayi bane ba Ebola bakaba baburiwe irengero nyuma yaho ku wa gatatu nijoro ikigo kivurirwamo Ebola cy'i Butembo kigabweho igitero.

Iki kibaye igitero cya kabiri kigabwe ahavurirwa Ebola - mu ntara ya Kivu y'amajyaruguru mu burasirazuba bw'igihugu - mu gihe cy'iminsi itatu n'abantu bitwaje intwaro bataramenyekana.

Mu bitero byombi, aba bantu bitwaje intwaro batwitse ahavurirwa Ebola ndetse bamena n'ibikoresho byifashishwa mu buvuzi.

Minisiteri y'ubuzima muri Kongo ivuga ko iri gushakisha aho abarwayi ba Ebola bane batorotse muri icyo gitero cy'i Butembo baba baherereye. Bashobora kwanduza cyane iyi ndwara abandi bantu bagira aho bahurira na bo.

Abandi bantu 32 bacyekwaho kuba barwaye Ebola na bo baratorotse ubwo abantu bitwaje intwaro batwikaga iki kigo cy'i Butembo kivurirwamo Ebola.

Ntibiramenyekana neza niba abagabye iki gitero barashakaga gutorocyesha abahavurirwaga.

Leta ya Kongo itangaza ko ubu igiye kohereza abasirikare gucunga umutekano w'ibigo bivurirwamo Ebola. Muri aka gace k'uburasirazuba bwa Kongo kagaragaramo indwara ya Ebola, hari imitwe yitwaje intwaro ibarirwa mu macumi.

Abakora mu bikorwa by'ubuzima bagiye bahura n'ingorane yo kutagirirwa icyizere na bamwe mu batuye ako gace.

Skip Ibisomwa cane and continue reading
Ibisomwa cane

End of Ibisomwa cane

Abaganga bavura umurwayi bitaremezwa ko arwaye Ebola mu kigo cy'i Butembo gifashwa na MSF, mu kwezi kwa cumi na kumwe mu mwaka ushize wa 2018

Ahavuye isanamu, AFP/Getty Images

Insiguro y'isanamu, Abaganga bavura umurwayi bitaremezwa ko arwaye Ebola mu kigo cy'i Butembo gifashwa na MSF, mu kwezi kwa cumi na kumwe mu mwaka ushize wa 2018

Ibiro ntaramakuru Reuters bisubiramo amagambo akubiye mu itangazo ry'ishyirahamwe ry'abaganga batagira umupaka ba Médecins Sans Frontières (MSF) - rifatanya na minisiteri y'ubuzima ya Kongo mu kwita kuri icyo kigo cyo kuvuriramo Ebola cy'i Butembo - rivuga ko ryamaganye icyo "gitero giteye isoni".

MSF yongeyeho ko kuri ubu, ibikorwa byayo biri kwibanda ku gucunga umutekano w'abarwayi n'abakozi bayo.

Mu ijoro ryo ku cyumweru gishize, nabwo abantu bitwaje intwaro bataramenyekana bateye ikigo kivurirwamo Ebola kiri mu mujyi wa Katwa uri bugufi y'aha i Butembo, bica umwe mu baganga bahakoraga.

Abantu barenga 550 ni bo bamaze kwicwa n'iyi ndwara ya Ebola kuva yatangazwa ko yongeye kwaduka muri Kongo mu kwezi kwa munani mu mwaka ushize wa 2018 - ku nshuro ya 10 mu mateka y'iki gihugu kuva yahagagaragara bwa mbere mu mwaka wa 1976 - kandi bisa nkaho itazahacika mu gihe cya vuba.