Umubare w'abamaze guhitanwa na Ebola muri Repubulika ya Demokarasi ya Kongo ukomeje kwiyongera

Abategetsi bakora mu rwego rw'ubuzima muri Repubulika ya Demokarasi ya Kongo, baravuga ko abantu 55 ari bo byibazwa ko bamaze guhitanwa n'indwara ya Ebola yadutse mu burasirazuba bw'iki gihugu.

Leta yemeje ko nta shiti 28 muri bo bazize virusi ya Ebola.

Inkingo n'imiti ya Ebola ikiri mu igeragezwa, ni byo biri kwifashishwa mu gukumira ko Ebola isakara no mu bice itarageramo. Ariko abategetsi bateganya ko umubare w'abarwayi ba Ebola uziyongera.

Ibigo bibiri biri kuvurirwamo Ebola muri Kivu y'amajyaruguru birenda kurengerwa ubushobozi mu gihe ikigo gishya cyo kuvuriramo Ebola kiri hafi kubakwa mu ntara bituranye ya Ituri.

Abakora mu bikorwa by'ubuzima bari gukurikirana abantu 1500 bagize aho bahurira n'abarwayi ba Ebola.

Ariko ni akazi kagoye kubera ibikorwa by'umutekano mucye byongeye kubura mu burasirazuba bwa Kongo, ahakorera imitwe myinshi y'inyeshyamba.