Burundi: Igipolisi kivuga ko kiri gukora itohoza ku bamenyeshamakuru 4 bafunze

Inyandiko gusa
Christine Kamikazi na Agnès Ndirubusa

Ahavuye isanamu, YagaBurundi

Insiguro y'isanamu, Abamenyeshamakuru ba Iwacu, Christine Kamikazi, ibubafu, na Agnès Ndirubusa bapfunzwe hamwe na bagenzi babo kuva kuwa kabiri

Inkuru yavuguruwe

Igipolisi c'Uburundi catangaje ko kiriko gikora itohoza ku bamenyeshamakuru bane ba Journal Iwacu bafungiye kuri komisariya ya Bubanza.

Igipolisi ntabwo catangaje ivyaha bagirizwa, kivuga ko amatohoza akorwa mw'ibanga, nibiba ngombwa abo bamenyeshamakuru bazashikirizwa inzego zijejwe ubutungane.

Christine Kamikazi, Agnès Ndirubusa, Térence Mpozenzi, Egide Harerimana n'umushoferi wari ubatwaye Adolphe Masabarakiza bafashwe kuwa kabiri saa sita bafatiwe mu ntara ya Bubanza ahariko harabera imirwano y'ingabo za leta n'inyeshamba.

Gushika ubu aba bamenyeshamakuru b'ikinyamakuru Iwacu bapfungiye mu gasho k'igipolisi i Bubanza.

Ejo kuwa gatatu, babajijwe n'igipolisi ariko ico bagirizwa nticamenyeshejwe nk'uko bivurwa na Antoine Kaburahe, umuyobozi w'ico kinyamakuru.

Abategetsi ntabwo baratangaza ico abo bamenyeshamakuru bagirizwa.

Kuwa kabiri bari bagiye i Bubanza gutohoza amakuru y'gitero c'abitwaje ibirwanisho cari cabaye kuva mu gitondo c'uwo munsi.

Skip Ibisomwa cane and continue reading
Ibisomwa cane

End of Ibisomwa cane

Umushingwamanza wabo yajanye na Leandre Sikuyavuga - ajejwe uruganda rwabo rw'amakuru (editeur en chef) - aho babarizwa.

Aba bakavuga ko basanze abo bamenyeshamakuru barushe.

Ishirahamwe ry'abamenyeshamakuru mu Burundi (UBJ) ryiyamiriza uko bafashwe, bakakwa n'ibikoresho vyabo.

Iri shirahamwe risaba ko barekurwa kuko batari abagizi ba nabi, batagiye binyegeza, ahubwo bahagaritswe bari ku kazi kabo.

Tambuka X ubutumwa
Uremeye ibiri kuri X?

Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.

Uragaba: Ibitangwa n'izindi mbuga bishobora kubamwo gutangaza

Impera ya X ubutumwa

Amakuru ava mu Burundi avuga ko naho hatarashirwa ahabona ivyo bagirizwa, igipolisi cabagumije mu gasho.

Ishirahamwe rirengera abamenyeshamakuru muri Afrika rimenyesha ko "Abamenyeshamakuru bafise uburenganzira bwo gutororokanya amakuru ya yegereyegere, abajejwe umutekano bakabarinda aho kubafunga".

Hejuru uhereye i bubamfu; Térence Mpozenzi, Agnès Ndirubusa Egide Harerimana. Hasi: Christine Kamikazi n'umushoferi wabo Adolphe Masabarakiza baracyapfunze

Ahavuye isanamu, Iwacu

Insiguro y'isanamu, Hejuru uhereye i bubamfu; Térence Mpozenzi, Agnès Ndirubusa Egide Harerimana. Hasi: Christine Kamikazi n'umushoferi wabo Adolphe Masabarakiza baracyapfunze

Antoine Kaburahe amenyesha ko bakomeje kurungikirwa ubutumwa bubihanganisha n'ubundi bubaca intege kuko hari bamwe bijijanya ico abo banyamakuru bagiye gukora i Bubanza.

Bwana Kaburahe avuga ko aba bamenyeshamakuru bari bagiye mu kazi kabo i Musigati mu Ntara ya Bubanza gutara amakuru kandi ko ivyo ari akazi gakwiye k'umunyamakuru.

Yandika ati: "Abamenyeshamakuru, b'ukuri, baja kurondera amakuru, ntabwo ari amakuru aza kubarondera mu biro vyabo".

Umumenyeshamakuru Jean Bigirimana w'iki gitangazamakuru Iwacu yafashwe mu kwezi kw'indwi 2016 n'abantu batamenyekanye, kuva ico gihe ntiyasubiye kuboneka.

Abakorana nawe bakeka ko yishwe kubera akazi kiwe.