Collodd Williams o 5-3 yn erbyn Stephen Maguire cyn i Stevens golli o'r un sgôr yn erbyn pencampwr y llynedd, John Higgins. Roedd Higgins yn cymryd rhan yn ei gystadleuaeth gyntaf ers marwolaeth ei dad yn ddiweddar. Fe fydd yr Albanwr yn awr yn wynebu Ali Carter, y gŵr y trechodd yn y rownd derfynol y flwyddyn ddiwethaf. Ac yn gynharach yn y dydd fe ddaeth rhediad Mark Williams yn y gystadleuaeth i ben hefyd. Er colli'r ffrâm agoriadol roedd hi'n edrych yn debyg y byddai'r Cymro yn mynd fewn ar yr egwyl yn arwain 3-1 ond i Maguire ddod yn gyfartal. Wedi rhediad o 63 roedd Williams yn ôl ar y blaen ac yn arwain 3-2. Ond sicrhaodd Maguire rediadau o 105 a 68 cyn selio ei bedwaredd fuddugoliaeth mewn pum gem yn erbyn Williams. Yn y rownd gyn-derfynol fe fydd Maguire yn wynebu Mark Selby, drechodd Graeme Dott 5-3.
 | 
