Bu Davies yn arwain am ran fwyaf o'r ras cyn i'r Iseldirwr Maarten van der Weijden fanteisio a'i guro o 1.5 eiliad.

Disgrifiodd Davies y ras fel "yr anoddaf erioed" a bu'n rhaid iddo dderbyn triniaeth meddygol wedi dwy awr yn y dŵr.

Dywedodd bod nifer o'r cystadleuwyr wedi defnyddio tactegau 'brwnt' wrth geisio ei dynnu yn ôl.

"Fe wnes i roi popeth a dyna be' ro' ni eisiau gwneud - ac mae gennyf rywbeth i ddangos am hynny yn awr," meddai Davies.

"Dim ond tair ras 'dwi wedi gwneud o'r blaen a 'dwi'n dysgu drwy'r adeg."

Ymateb David Davies wedi'r ras

Ychwanegodd Davies ei fod wrth ei fodd ei fod wedi ychwanegu medal arian at ei gasgliad Olympaidd.

Cipiodd fedal efydd yn Athen bedair blynedd yn ôl yn y 1500m dull rhydd.

Talodd Davies deyrnged i Van der Weijden, gŵr sydd wedi goroesi lewcemia, gan ddweud: "Mae ei stori yn un anhygoel ac yn ysbrydoliaeth."

Hon oedd y drydedd fedal i Brydain gipio yn y ras nofio agored yn Beijing

Ddydd Mercher sicrhaodd Keri-Anne Payne a Cassie Patten arian ac efydd yn ras y merched.